EURO - 2024: Nıderland pen Frantsııa kezdesýi teń aıaqtaldy

<p>ASTANA. KAZINFORM - Fýtboldan 2024 jylǵy Eýropa chempıonatynyń segizinshi oıyn kúnin D tobyndaǵy Nıderland jáne Frantsııa quramalary túıindedi.</p>

Jankúıerler qurlyqtyq dodada eki quramany da bas júldeden úmitkerler qataryna qosyp otyr. Quramynda sheberligi shyńdalǵan kóptegen oıynshy bar. Sondyqtan olar toptyq kezeńde eshbir qıyndyqsyz pleı-off satysyna shyǵady degen boljam aıtyldy.

Alǵashqy týrda atalǵan quramalar kósilip oıyn kórsete alǵan joq. Nıderland Polshany 2:1 esebimen jeńse, odan keıin Frantsııa Avstrııany 1:0 esebimen tize búktirdi.

Birinshi týrda frantsııalyq shabýylshy Kılıan Mbappe jaraqat alyp, bul oıynǵa qatyspaýy múmkin degen joramal aıtyldy. Frantsııa quramasynyń bas bapkeri Dıde Desham ony qosalqy quramda qaldyrdy.

Oıyn basynan quramalar birden shabýylǵa kóshti. Ásirese, frantsııalyq fýtbolshylar belsendi qımyl kórsetti.

Kezdesýdiń 69-mınýtynda Nıderland quaramysynyń jartylaı qorǵaýshysy Havı Sımons gol soqqan edi. Tóreshiler VAR qaraǵannan keıin ony erejege saı soǵylmaǵanyn anyqtap, esepke alǵan joq.

Quramalar 0:0 esebine qanaǵat bildirdi.

Endi 22 maýsymda E tobynda Belgııa men Rýmynııa oınasa, F tobynda Grýzııa men Chehııa, Túrkııa men Portýgalııa sheberlik baıqasady.

Eske salsaq, budan buryn D tobyndaǵy Avstrııa Polshany 3:1 esebimen jeńse, E tobynda Ýkraına quramasy Slovakııany 2:1 esebimen tize búktirdi.