Eýro-2024: Frantsııa jeńisti jolyn jalǵastyrdy

ASTANA. QazAqparat - Fýtboldan 2024 jylǵy Eýropa chempıonatyna irikteý satysy aıasynda 2-týrdyń ekinshi oıyn kúni ótti, dep habarlaıdy QazAqparat tilshisi.

Negizgi oıynnyń biri V tobyndaǵy Irlandııa men Frantsııa quramalary arasynda boldy. Alǵashqy týrda Frantsııa Nıderlandty 4:0 esebimen oısyrata jeńse, Irlandııa oıyn ótkizgen joq.

Kezdesý barysynda qos qurama shabýylǵa kóbirek kóńil bóldi. Oıyn taǵydyryn 50-mınýtta frantsııalyq Benjamen Pavar soqqan jalǵyz gol sheshti.

Osylaısha Frantsııa qarsylasynan 1:0 esebimen basym túsip, óz tobynda birinshi oryndaǵy ornyn saqtap qaldy.

Sondaı-aq atalǵan topta Nıderland óz alańynda Gıbraltardy 3:0 esebimen tize búktirdi.

Al E tobynda Polsha quramasy Albanııany 1:0 esebimen jeńse, Moldavııa men Chehııa 0:0 esebine qanaǵat bildirdi. F tobynda Avstrııa Estonııany 2:1, Shvetsııa Ázerbaıjandy 5:0 jeńip ketti.

G tobynda Vengrııa quramasy Bolgarııadan 3:0 esebimen basym tússe, Chernogorııa Serbııaǵa 0:2 esebimen jol berdi.

Eske salsaq, H tobynda 26 naýryzda Qazaqstan quramasy óz alańynda Danııany 3:2 esebimen tize búktirdi.