Eýrazııalyq odaqtyń ortaq elektr energııa naryǵy men memlekettik satyp alýǵa qatysty erejeleri bekitildi

ASTANA. QazAqparat - 25 qańtarda Premer-Mınıstrdiń orynbasary – Saýda jáne ıntegratsııa mınıstri Serik Jumanǵarın bastaǵan memlekettik organdar, «Atameken» UKP jáne bıznes ókilderinen quralǵan qazaqstandyq delegatsııa Máskeýde ótken Eýrazııalyq ekonomıkalyq komıssııa Keńesiniń bıylǵy birinshi otyrysyna qatysty.

QR Saýda jáne ıntegratsııa mınıstrligi baspasóz qyzmetiniń habarlaýynsha, EEK Keńesine qatysýshylar 38 máseleni qarady, olardyń árqaısysyn egjeı-tegjeıli pysyqtap, birqatar sheshim qabyldady. Bıznes úshin mańyzdy EAEO-ǵa qatysýshy elderdiń ónerkásiptik taýardyń 55 ataýy boıynsha memlekettik satyp alýlarǵa kedergisiz qol jetkizý máselesi sheshildi.

Ol úshin EEK Keńesi qoldanystaǵy qujattarǵa ózgerister engizý týraly sheshim qabyldady, olardy óndiristik jáne tehnologııalyq operatsııalardyń sharttarymen tolyqtyrdy. Ózgerister arnaıy mashına jasaý (arnaıy tehnıka), mýzykalyq aspaptar men jabdyqtar, elektronıka jáne radıoelektronıka salalaryna áser etti.

EAEO-nyń ortaq elektr energııasy naryǵyn qalyptastyrý maqsatynda Elektr energııasyn berýdiń memleketaralyq qyzmetterine qol jetkizý qaǵıdalary bekitildi. Qatysýshy elder elektr energııasyn memleketaralyq tasymaldaý qyzmetterine qol jetkizý qaǵıdattary, tártibi, sonyń ishinde tıisti kelisimderdi jasaý, resimdeý, ózgertý, toqtatý jáne basqa da erekshelikteri boıynsha ortaq pikirge keldi.

Qujat ortaq elektr energııasy naryǵyna qatysýshylardyń qýat kózin satý kezinde ony memleketaralyq tasymaldaýǵa kedergisiz qoljetimdiligin aıqyndaıdy. Maquldanǵan qujat 2023 jylǵy 2-3 aqpanda Almatyda ótetin Eýrazııalyq úkimetaralyq keńeske (EÚAK) bekitýge joldanady.

Keńes sheshimimen tusqaǵazdar óndirisi úshin shıkizat retinde paıdalanylatyn plastıfıkatsııalanǵan polıvınılhlorıdke EAEO biryńǵaı kedendik tarıfi ımporttyq kedendik baj salyǵynyń nóldik mólsherlemesi bekitildi. Mólsherleme EEK Keńesiniń sheshimi kúshine engen kúnnen bastap jáne 2024 jylǵy 29 aqpanǵa deıin qoldanysta bolady. Qazirgi ýaqytta osy materıalǵa qoldanylyp júrgen mólsherleme kedendik qunnyń 6,5% quraıdy.

Sondaı-aq qatysýshylar EAEO-ǵa qatysýshy elderdiń zańnamalaryn úılestirýge, ónimder tizbesine ózgerister engizýge, ıntegratsııalanǵan aqparattyq júıeni, kedendik, kóliktik rásimderdi, aýyl sharýashylyǵyn jáne t. b. damytýǵa baǵyttalǵan tehnıkalyq reglamentteriniń talaptaryn saqtaý máselelerin qarady.

Kelesi otyrys 2023 jylǵy 17 aqpanda Máskeýde ótedi.

Foto: gov.kz