Eýrazııalyq ıntegratsııa mal sharýashylyǵy ónimderiniń erkin aınalymyna jol ashady

ASTANA. QazAqparat - Eýrazııalyq ıntegratsııa mal sharýashylyǵy ónimderiniń erkin aınalymyna jaǵdaı jasaıdy. Búgin Astanadaǵy Ortalyq kommýnıkatsııalar qyzmetindegi brıfıng barysynda Aýyl sharýashylyǵy mınıstrligi Veterınarlyq baqylaý jáne qadaǵalaý komıteti tóraǵasynyń orynbasary Mereke Taıtýbaev osylaı dedi.

Tóraǵa orynbasarynyń aıtýynsha, Kedendik odaq aıasyndaǵy veterınarlyq-sanıtarlyq sharalar jónindegi kelisim boıynsha mal sharýashylyǵy ónimderin, shıkizatyn satý kezinde veterınarlyq baqylaýy jeńildetilgen.
«Máselen, buryn shekara arqyly bir elden ekinshi elge taýar jiberý úshin 6 qujatty aýystyrý kerek bolatyn. Endi onyń ornyna veterınalyq sertıfıkat qoldanylady. Bul Keden odaǵy keńistigindegi elder arasyndaǵy qatynasty anaǵurylym jeńildetedi. Onyń ústine úsh elge ortaq reestr qurylǵan», - dedi M. Taıtýbaev.
Onyń sózine qaraǵanda, eýrazııalyq ıntegratsııa aıasynda veterınarlyq preparattardy paıdalaný salasynda da jaǵymdy jaqtar barshylyq. Máselen, eger buǵan deıin kelisim kúshine enbeı turǵan shaqta Qazaqstan aýmaǵyna veterınarlyq preparattardy satý úshin arnaıy tirkeý ótý qajet bolatyn. «Al qazirgi tańda Qazaqstanmen qosa Reseı, Belarýs elderinde tirkelgen preparat Keden odaǵynyń aýmaǵynda esh kedergisiz teńdeı qyzmet ete beredi», - dedi M.Taıtýbaev.