«Eýrazııa» munaı jobasy aıasynda barlaý kezinde 15 shaqyrymǵa deıin burǵylaý kerek - B. Qýandyqov

ASTANA. QazAqparat - Kaspıı jaǵalaýy oıpańynda kómirsýtekter kenin barlaý jónindegi «Eýrazııa» halyqaralyq jobasyna boljanǵan ınvestıtsııanyń jalpy kólemi 520 mln. AQSh dollaryn qurap otyr.

Bul týraly búgin Astanada ótken  «dóńgelek ústelde» atalǵan jobanyń bas úılestirýshisi Baltabek Qýandyqov málim etti.

QR Energetıka mınıstrliginiń málimetine qaraǵanda, «Eýrazııa» jobasy aıasyndaǵy jumys jospary 6 jylǵa eseptelgen jáne bul baǵyttaǵy sharalar shartty túrde 3 kezeńge bólindi. 1 kezeńde ótken jyldardyń geologııalyq-geofızıkalyq materıaldaryn qaıta óńdeý, ekinshisinde, jańa eki deńgeıli aýmaqtyq baǵdardy qurýmen aýqymdy geofızıkalyq zertteýlerdi júrgizý, al úshinshi kezeńde «Kaspıı-1» jańa tirek-uńǵymasyn 14-15 shaqyrym tereńdikke deıin burǵylaý jumystary qamtylǵan.

«Investıtsııalardyń aldyn ala boljanǵan kólemi 520 mln. dollardy qurap otyr. 15 shaqyrymǵa deıin burǵylaý usynysy bekerden jasalyp otyrǵan joq. Shógindi keshen shamamen 25 shaqyrymdy qamtyp otyr. Búginde bul turǵyda 5 shaqyrymǵa deıin zertteldi. Tereń qabattary jaıynda tolyq bilý úshin bizge kem degende 12-15 shaqyrym tereńdikke deıin uńǵyma kerek»,-dep toqtaldy B. Qýandyqov.

Onyń sózine qaraǵanda, 520 mln. dollar kólemindegi ınvestıtsııa atalǵan barlyq úsh kezeńdegi jumystardy qamtıdy. 2016 jyldan bastalǵan jumystardyń nátıjesinde, joba 2021 jylǵa qaraı aıaqtalady.

Kaspıı jaǵalaýy oıpańynyń 30 paıyz bóligi Reseı aýmaǵynda jatyr. Osy rette Kaspıı jaǵalaýy oıpańynyń biryńǵaı geologııalyq modeliniń qurylymy men geologııalyq zertteý máselesi turǵysyndaǵy yntymaqtastyqqa qos tarap ta múddeli.

Budan buryn habarlanǵandaı, QR Energetıka mınıstri Qanat Bozymbaev bıylǵy kóktemniń sońyna deıin Kaspıı jaǵalaýy oıpańynda kómirsýtekter kenin barlaý jónindegi  «Eýrazııa» halyqaralyq jobasyna  jańa ınvestorlar qosylýy yqtımal ekenin aıtqan bolatyn.

Búginde joba aıasynda jańa ınvestorlardy tartý jóninde belsendi jumystar júrip jatqanyna toqtalǵan mınıstr, «bul kúrdeli jobaǵa sheshim qabyldaý belgili bir ýaqytty qajet etetinin biz jaqsy túsinemiz. Sondyqtan da konsortsıýmnyń áleýetti qatysýshylarynan mamyr aıynyń sońyna deıin  tıisti sheshimdi kútetinimizdi aıtqym keledi»,-dedi.

 «Eýrazııa» jobasy Kaspıı jaǵalaýy oıpańynda tereńde jatqan ken oryndaryn barlaýǵa arnalǵan. Onyń negizgi maqsaty - kómirsýtekterdiń jańa oryndaryn anyqtaý úshin óńirdiń tereńdegi  geologııalyq qabatyn zertteý. Joba aıasynda asa tereń uńǵymalardy burǵylaýǵa ınnovatsııalyq tehnologııalardy ázirleý josparlanyp otyr.