«Eýrazııa» kınofestıvaliniń jeńimpazdary belgili boldy
Festıvaldiń árbir kúni qyzyqty is-sharalarǵa toly boldy. Kúndelikti baıqaýǵa qatysqan fılmderdiń kórsetilimderi, keıbir kartınalar úlken ekranda alǵash ret kórsetildi.
Al, kórermender týyndy avtorlarymen kezdesip, tolǵandyrǵan suraqtaryna jaýap aldy. Bıyl festıval baǵdarlamasyna 30-ǵa jýyq fılm enip, onyń 22-si eki negizgi baıqaýǵa iriktelip alyndy.
15 eldiń kınematografısterin jınaǵan halyqaralyq festıval Ortalyq Azııa men Túrki álemi elderine arnaldy. Qazylar alqasynyń sheshimimen eki fılm festıvaldiń bas júldesin aldy.
Jeńimpaz fılmder tek júldege qol jetkizip qana qoıǵan joq. Olardyń tereń emotsıonaldy jáne kórkemdik biregeıligi arqyly kózge túsken fılmderi kásibı mamandardyń pikir almasýyna arqaý boldy. Osylaısha, kıno óneriniń adamdardy biriktirip, ótkir máselelerdi kótere alatyndyǵy taǵy da dáleldendi.
Ortalyq Azııa jáne Túrki álemi elderi baıqaýynyń eń úzdik fılm atalymynda «Aq tyrnalar bıleıtin jerde» (Saha Respýblıkasy, Reseı) fılmi jeńiske jetti. Beıneshilik pen kórkem poezııaǵa toly bul kartına salt-dástúrdi saqtaı otyra qazirgi zamannyń synaqtarynda tótep berýge shaqyrady.
Ekinshi Gran-prı Polıak rejısseri Gjegoj Debovskııdiń «Joqtyń qasy» fılmine buıyrdy. Bul mınımalıstik shyǵarma jalǵyzdyq pen erkindik arasyndaǵy názik shekarany zerttep, kórermenderdi ómirdiń máni týraly oılanýǵa ıtermeleıdi.
«Jumysymyzdyń úzdik dep tanylǵanyna qatty tań qaldym jáne óte qýanyshtymyn. Qazir emotsııamdy sózben jetkize almaı turmyn. Festıvalde kóptegen jaqsy jáne qyzyqty fılmder men talantty rejısserler bolǵanyn bilemin. Bul biz úshin úlken mártebe. Biz bul fılmdi nebári 17 kúnde túsirdik. Bul bıýdjettik fılm jáne biz derekti fılm ádisterin qoldandyq, akterlermen sol adamdar turatyn naqty jerlerde túsirdik. Meniń oıymsha, dál osy tásil fılmdi erekshe etti», — deıdi rejısser Gjegoj Debovskıı.
Sonymen qatar, úzdik akterler men rejısserler anyqtaldy. Sonymen, Ortalyq Azııa jáne Túrki álemi elderiniń baıqaýynda kimder jeńimpaz atandy:
— Eń úzdik áıel róli úshin «Ǵashyqtar taýy» fılmine túsken aktrısa Elza Karımova marapattaldy.
— Qyrǵyzstandyq «Shekaradaǵy mámile» fılminde basty róldi somdaǵan Abylaı Marat eń úzdik er adam róli úshin marapattaldy.
— Qazylar alqasynyń arnaıy syılyǵy rejısser Mýrat Fıratoglý túsirgen «Hemme óletin kúnniń birinde» fılmine berildi. Kartına áleýmettik ádiletsizdik, tózimdilik jáne bostandyq úshin kúres týraly suraqtardy kóteredi. Qazylar alqasy rejısserdiń shıelenis sátterin jáne áserli atmosferany sheberlikpen kórsete alǵanyn erekshe atap ótti.
— Shárıpa Orazbaevanyń «Tul» fılmin qazylar alqasy erekshe atalym boıynsha marapattady.
— Ortalyq Azııa men túrki álemi elderi arasyndaǵy baıqaýda úzdik rejıssýra marapatyna ıe bolǵan «Joqtaý» fılmi dástúrli aza tutý rásimi arqyly dúnıeden ozǵan adamnyń keıpin máńgi este saqtaýdyń tereń maǵynasyn asha aldy.
— Halyqaralyq baıqaýda eń úzdik áıel róli úshin Florentına Holtsıenger (Aýstrııa, «Aı» fılmi) marapattaldy. Sondaı-aq, Artýr Pachesnyı «Joqtyń qasy» fılmindegi shıelenisti keremet kórsete alǵany úshin júldeger atandy. Asıf Islamnyń (Bangladesh) «Nırvana» fılmi vızýaldy beınelerdi jańasha qoldaný jáne olardyń fılosofııalyq astary úshin qazylar alqasynyń arnaıy syılyǵyna ıe boldy. Ońtústik Koreıalyq rejısser O Chjon Mın «Jyl maýsymdary úıi» fılmi úshin úzdik rejıssýra atalymy boıynsha marapatqa ıe boldy. Týyndynyń kúrdeli qurylymy jáne fılosofııalyq oı tereńdigi kórermenderdi tańǵaldyrdy.
Sondaı-aq, jabylý saltanatynda arnaıy syılyqtar tabys etildi:
— NETPAC qazylar alqasynyń syılyǵy rejısser Mahdı Fleıfeldiń «Belgisiz elge» týyndysyna berildi.
— Halyqaralyq baıqaý qazylar alqasynyń tóraǵasy Nýrı Bılge Djeılan «Álemdik kınematografııaǵa qosqan erekshe úlesi úshin» marapatyna ıe boldy. Sondaı-aq, áıgili qazaqstandyq akter Doshan Joljaqsynov «Qazaq kınematografyna qosqan erekshe úlesi úshin» arnaıy syılyǵynyń ıegeri atandy.
Festıval shyn máninde Qazaqstan kınosynyń jetistikterin tanytý alańyna aınaldy.
Aýqymdy sharany QR Mádenıet jáne aqparat mınıstrligi men Sháken Aımanov atyndaǵy «Qazaqfılm» ulttyq kınostýdııasy uıymdastyrdy.
Eske salaıyq, XVII «Eýrazııa» halyqaralyq kınofestıvali demeýshiler esebinen ótti.