Eýrazııa ekonomıkalyq odaǵyna kólikti ýaqytsha kirgizý merzimi uzartyldy

NUR-SULTAN. QazAqparat – Eýrazııa ekonomıkalyq odaq keńesi jeke tulǵalar úshin Eýrazııa ekonomıkalyq odaǵynyń keden aýmaǵynda avtomobılder men basqa kólik quraldarynyń ýaqytsha júrip-turý merzimin 30 qyrkúıekke deıin uzartty. Bul týraly Eýrazııa ekonomıkalyq odaǵynyń baspasóz qyzmetine silteme jasap QazAqparat habarlaıdy.

Osylaısha avtomobılder men basqa tehnıkany ýaqytsha kirgizgen azamattar 30 qyrkúıekke deıin olardy EAEO-dan qaıta shyǵarý mindetinen bosatyldy. Tıisinshe olarǵa qatysty ákimshilik sharalar qoldanylmaı, kedendik tólem tólenbeıdi.

Bul sheshim sondaı-aq Kalınıngrad oblysynan jeńildik tártibimen kedennen ótkizilgen kólikpen kelip, úıine orala almaǵan azamattarǵa da qatysty.

Keńes sondaı-aq EAEO-ǵa turǵylyqty mekenjaıǵa kóship kelgen tulǵa, bosqyn, sharasyzdan qonys aýdarýshylardyń odaqqa jeke múligin baj salyǵyn tólemeı kirgizýdiń 18 aılyq merzimin 30 qyrkúıekke deıin toqtatty.

Sheshim 1 naýryzdan 30 qyrkúıekke deıin týyndaǵan nemese týyndaıtyn máselelerge qatysty bolady. Bul sheshim EAEO-nyń koronavırýs indetine qarsy kúres boıynsha qabyldaǵan sharalaryna baılanysty azamattardyń óz quqyqtaryn iske asyryp, mindetterin oryndaý múmkindiginiń joqtyǵy sebebimen qabyldanǵan.