«Eurasian Book Fair-2019»: Kitapsúıer qaýymnyń merekesi bastaldy

NUR-SULTAN. QazAqparat - Búgin elordadaǵy «Kórme» ortalyǵynda «Eurasian Book Fair-2019» ІV Eýrazııalyq halyqaralyq kitap kórme-jármeńkesiniń ashyldy. Bul shara 27 sáýirge deıin jalǵasady, dep habarlaıdy QazAqparat tilshisi.

«Elordamyzda tórt kún ótetin ІV Eýrazııa halyqaralyq kitap kórme-jármeńkesine jınalǵan jurtshylyqty kórgenime qýanyshtymyn. Biz búgin Eýrazııa aýmaǵyndaǵy mańyzdy mádenı sharanyń kýágeri atanyp otyrmyz. Kitap forýmyn ótkizý - elimizdegi ádebıet salasynyń ǵana jetistigi emes, ol barlyq kitapsúıer qaýymnyń merekesi», - dep atap ótti saltanatty is-sharany ashqan QR Mádenıet jáne sport mınıstri Arystanbek Muhamedıuly.

«Eurasian Book Fair» - eýrazııalyq halyqaralyq kitap kórme-jármeńkesi elimizdegi iskerlik jáne gýmanıtarlyq áriptestikti damytý jáne nyǵaıtý maqsatynda TMD, Eýropa jáne Azııa elderiniń baspa, kitap saýdasy uıymdaryn, mádenı jáne bilim berý ortalyqtaryn úlken zııatkerlik alańǵa biriktiretin asa iri kitap forýmy.

Bul kórmege 13 memleketten kelgen 90 kompanııa qatysýda. Onyń ishinde Reseı, Ázerbaıjan, Tájikstan, Armenııa, Qyrǵyzstan, Túrkııa, Qytaı, Iran, Polsha, Belgııa, Latvııa, Ýkraına, Ózbekstan bar.

Jastar jyly aıasynda jas avtorlardyń qatysýymen «Ashyq áńgime» aqyndyq marafon, kitaptyq áńgimelesý (book talks), ádebıet klýbynyń otyrysy, «Kitapty qalaı tıimdi oqý kerek?» taqyrybyna arnalǵan sheberlik synyptary, tanymal aqyn-jazýshylarmen avtograf-sessııalary uıymdastyrylady. Olardyń ishinde balalar kitaby Búkilreseılik festıvaliniń dırektory jáne jazýshy ıÝrıı Nechıporenko, «Kıt plyvet na sever», «Sovınyı volk» kitaptarynyń avtory Anastasııa Strokına bar.

Shara aıasynda tanymal mádenıet qaıratkerleri, jazýshylar jáne aqyndarmen kezdesýler uıymdastyrylady. Olardyń arasynda jas aqyn Mergen Toqsanbaı men Qazaqstan Respýblıkasynyń Jazýshylar odaǵynyń tóraǵasy, aqyn Ulyqbek Esdáýlet bar.

Kórme-jármeńkeniń alǵashqy kúni L.N.Gýmılev atyndaǵy Eýrazııa ulttyq ýnıversıtetiniń rektory Erlan Sydyqovtyń «Shákárim» atty kitabynyń tusaýeser rásimi boldy. Sharany akademık Dıhan Qamzabekuly júrgizip otyrdy. Jıynda birqatar memleket jáne qoǵam qaıratkerleri avtordyń «Shákárim» eńbegine qatysty oı-pikirlerin bildirdi.

Óz kezeginde sóz alǵan E. Sydyqov san tilge aýdarylǵan eńbektiń arǵy-bergi tarıhyna toqtala kelip, jaǵymdy jańalyq - súıinshi habardy jarııa etti. Atap aıtqanda, aǵymdaǵy jyly «Qunanbaı» atty kitaby Reseı elinen «JZL» serııasy boıynsha jaryq kórmekshi.