Etnosaralyq birlik taqyrybyn jazyp júrgen qalamgerler marapattalady

ASTANA. QazAqparat - Mádenıetaralyq jáne etnosaralyq birlikti nyǵaıtý boıynsha ádebıet jáne jýrnalıstıka salasyndaǵy úzdik jumystardy anyqtaý úshin syılyqqa ótinimderdi qabyldaý bastaldy, habarlaıdy QazAqparat.

«Syılyqtyń maqsaty – jazýshylar men jýrnalısterdiń qoǵam men memleket aldyndaǵy sińirgen eńbegin, mádenıetaralyq jáne etnosaralyq birlikti nyǵaıtýǵa qosqan erekshe qundy úlesin taný.

Syılyqqa avtor (avtorlar) nemese avtorlar ujymy, shyǵarmashylyq ujymdar qatysa alady.

Ótinimderdi qabyldaý 2023 jylǵy 1 qyrkúıekten bastap 30 qyrkúıekke deıin júzege asyrylady», - dep jazdy Mádenıet jáne sport mınıstrligi.

Qazaqstan Respýblıkasynyń Mádenıet jáne sport mınıstrligi tómendegi nomınatsııalar boıynsha qujattardy qabyldaıdy:

- «Proza»;

- «Poezııa»;

- «Dramatýrgııa»;

- «Balalar ádebıeti».

Jumystardy ádebıet jáne jýrnalıstıka salasynyń eńbek sińirgen qaıratkerleri men sarapshylarynan turatyn qazylar alqasy baǵalaıtyn bolady.

Syılyq qorytyndysy boıynsha ár nomınatsııanyń úzdik ókiline «Mádenıetaralyq jáne etnosaralyq birlikti nyǵaıtý boıynsha ádebıet jáne jýrnalıstıka salasyndaǵy úzdik jumys syılyǵynyń laýreaty» ataǵy berilip, dıplom jáne aqshalaı syıaqy tabys etiledi.