Etnıkalyq qazaqtardyń elge oralý kórsetkishi artyp otyr - Tamara Dúısenova

  ASTANA. QazAqparat - QR Eńbek jáne xalyqty áleýmettik qorǵaý mınıstri Tamara Dúısenovanyń aıtýynsha, kóshi-qon saıasatyna qatysty zańnama ózgergeli beri sheteldegi qandastarymyzdyń elge oralý kórsetkishi ósti, dep xabarlaıdy QazAqparat tilshisi.

"Etnıkalyq qazaqtardyń qaıta oralýyna, beıimdelýine jáne kirigýine kedergi keltiretin birneshe problemalar ótken jyldan bastap kúshine engen zań aıasynda óz sheshimin tapty. Atap aıtsaq, etnıkalyq qazaqtarǵa oralman mártebesi qonystaný aımaǵyna qaramastan bir jylǵa berile bastady. Olardyń Qazaqstan Respýblıkasy azamattyǵyn alý merzimi tórt jyldan bir jylǵa qysqartyldy. Budan bólek, qandastarymyzdy utymdy qonystandyrý maqsatynda qosymsha eńbek resýrstaryn qajet etetin aımaqtarǵa joldaý sharalary qabyldandy. Nátıjesinde ótken jyly elimizge 16,5 myń oralman otbasy kóship keldi. Ol 2015 jylmen salystyrǵanda, 8,5 esege artyq", - dep atap kórsetti Dúısenova Úkimet otyrysynda.

Aıta keteıik , Úkimettiń búgingi otyrysynda Tamara Qasymqyzy kóshi-qon saıasatynyń 2017-2020 jyldarǵa arnalǵan tujyrymdamasy jobasyn tanystyrdy. Atalǵan qujatta sheteldegi etnıkalyq qazaqtarmen, olardyń ishinde daryndy ári isker azamattarmen tyǵyz baılanys ornatýǵa negizgi basymdyq berilgen. Joǵary bilikti mamandardy jeńildetilgen tártippen jumysqa alý jaıy da qarastyrylǵan.