Et qymbattaı ma – AShM jaýaby

<p>ASTANA. KAZINFORM &ndash; Aýyl sharýashylyǵy mınıstrligi Agrarlyq azyq-túlik naryqtary jáne aýyl sharýashylyǵy ónimin qaıta óńdeý departamentiniń dırektory Nazgúl Hatepova et baǵasy óspeıtinin aıtty.</p>

«Qazir et baǵasynyń ósý faktileri joq. Jyldyń basynan bastap elimizde ettiń baǵasy turaqty. Jalpy azyq-túlik taýarlaryna baılanysty ınflıatsııa deńgeıi joq. Qazir kerisinshe «-0,1 paıyz» baıqalýda», - dedi ol.

Mınıstrlik ókili ettiń qymbattamaýyna eksportqa qoıǵan shekteý sebepker boldy dep esepteıtinin aıtady.

«Etti qaıta óńdeý kásiporyndaryna shıkizat qoljetimdiligin qamtamasyz etý úshin iri qaranyń eksportyna shekteý qoıdyq. Ol degenimiz shıkizattyń eksportqa shıkizat retinde ketýin emes, ishtegi qoldanystaǵy júktemelerdi kóterý arqyly olardy ishte qaıta óńdep, odan keıin daıyn ónim túrinde eksportqa shyǵarý boıynsha jumystar júrgizilip jatyr. 2021 jyldan bastap bul shara júzege asyrylýda. Qazirgi kezde biz ishki naryqtaǵy júktemeniń ulǵaıǵanyn baıqap otyrmyz», - dedi Nazgúl Hatepova.

Buǵan deıin 26 qazannan bastap Qazaqstan aýmaǵynan úshinshi elderge jáne Eýrazııalyq ekonomıkalyq odaq elderine ógizsheler men toqtylardy eksporttaý kvotasyn bólý qaǵıdalary kúshine enetinin jazǵan edik.