Et eksporty ishki naryqtaǵy baǵa ósimine áser etip otyr - mınıstr

NUR-SULTAN. QazAqparat - Qazaqstan et eksportyn ulǵaıtqannan keıin ishki naryqtaǵy ónim baǵasy ósip otyr. Bul týraly búgin Aqordada QR Qaýipsizdik keńesiniń janyndaǵy Sarapshylyq keńes otyrysynda Aýyl sharýashylyǵy mınıstri Saparhan Omarov aıtty, dep habarlaıdy QazAqparat tilshisi.

Jıynda QR Prezıdentiniń kómekshisi - Qaýipsizdik keńesiniń hatshysy Qalmuhanbet Qasymov mınıstrden azyq-túlik eksporty ishki naryqtaǵy baǵaǵa qanshalyqty áser etetinin suraǵan bolatyn.

«Qazaqstan eksportty ulǵaıtýda. Bul jaqsy ári durys. Degenmen kóptegen sarapshynyń, onyń ishinde Ulttyq bank mamandarynyń pikirinshe, azyq-túlikti syrtqa shyǵarý ishki naryqtaǵy baǵanyń kóterilýine túrtki bolady eken. Máselen, et, un, jarma... Sizdiń oıyńyzsha, eksport ishki naryq baǵasyna áser ete me?», - dep surady Q.Qasymov.

Mınıstr azyq-túlik eksporty men ishki naryqtaǵy baǵanyń arasynda baılanys bar ekenin jasyrǵan joq.

«Árıne, ishki naryqqa eksporttyń áseri bar. Máselen, qazir biz et eksportyn jaqsy jolǵa qoıdyq. Bul rette jasyratyn eshteńe joq. Ózbekstan bizdiń etimizdi alyp jatyr. Sol sebepti elde et baǵasy kóterilip keledi. Biraq, ekinshi jaǵynan biz aýyl sharýashylyǵy ónimderiniń eksportyna shekteý qoıatyn bolsaq, máselen et pen unǵa, onda syrtqy naryqty joǵaltyp alamyz», - dedi S.Omarov.

Máselen, onyń alǵa tartqan deregine qaraǵanda Qazaqstan astyq eksportyna shekteý qoıǵan kezde syrtqy naryqtyń basym bóliginen aıyrylyp qalǵan.

«Qazir ǵana biz ony birtindep qalpyna keltirip jatyrmyz. Sondyqtan eń aldymen aýyl sharýashylyǵy ónimderi kólemin ulǵaıtýymyz kerek. Buǵan qosa, logıstıka, salyq salý, alypsatarlyq syndy ishki máselelerdi sheshýge tıispiz. Aıtalyq, óndirýshiler ettiń kelisin 1,5 myń teńgeden satady. Al sodan keıin ol et 2,2 myń teńgeden saýdalanady. Bul oraıda alypsatarlar paıda taýyp otyr», - dedi ol.