Estrada juldyzdarynyń qatysýymen «Ánim saǵan, Túrkistan» kontserti ótti

TÚRKІSTAN. QazAqparat - Túrkistan qalasynda «Túrkistandy birge túleteıik» jobasy aıasynda estrada juldyzdary Áıgerim Qalaýbaeva men Indıra Elemestiń «Ánim saǵan, Túrkistan!» kontserttik baǵdarlamasy ótti. Oblystyq mádenıet basqarmasy uıymdastyrǵan sharada osy óńirden shyqqan qos ánshi halyq júreginen oryn alǵan ánderin shyrqap, kórermenniń qoshemetine bólendi, dep habarlaıdy QazAqparat tilshisi.

Elbasy Nursultan Nazarbaevtyń «Bolashaqqa baǵdar: Rýhanı jańǵyrý» jáne «Uly dalanyń jeti qyry» maqalalaryn negizge ala otyryp, elimizdiń mádenı, rýhanı, tarıhı damýyna úles qosý maqsatynda uıymdastyrylǵan án keshin tórt myńǵa jýyq turǵyn tamashalady. Óner juldyzdary kontsert barysynda Túrkistan oblystyq mádenıet basqarmasynyń basshysy Nurdáýlet Isabek týǵan jerdiń halqyna aıryqsha kóńil-kúı syılap, ásem ánderimen baýraǵan estrada ánshilerine oblys ákimi jáne Túrkistan halqy atynan alǵys aıtty. Eki ánshige de estelik syılyqtar tabystady. Óz kezeginde Áıgerim Qalaýbaeva da kıeli shahar jurtshylyǵyna jyly lebizin bildirdi.

«Jeke shyǵarmashylyǵymyzǵa arnalǵan kontserttik baǵdarlamany eń alǵash kıeli de qasıetti Túrkistan oblysynan bastadyq. Oblystyń aýdan, qalalarynda ótken keshimiz rýhanı astanada qorytyndylandy. Qazaqstan Respýblıkasynyń Tuńǵysh Prezıdenti - Elbasy Nursultan Ábishuly Nazarbaevtyń «Rýhanı jańǵyrý» baǵdarlamasynyń eki jyldyǵy men Túrkistannyń oblys ortalyǵy atanýyna osy óńirden boıymyzda búr jarǵan óner tartýy arqyly úles qosqanymyzǵa qýanyshtymyz. Kıeli Túrkistan túrlene bersin!»,-dedi Áıgerim Qalaýbaeva.

Án keshin júrgizgen tanymal ánshi ári sazger Arman Dúısenov te týǵan jerdi túletýge óz úlesin qosý - ánshilerdiń paryzy ekenin erekshe atap ótti.

«Túrkistan qalasy - qanshama tulǵalardy túletken kıeli óńir. Qanshama óner ıeleriniń meken sanalady. Meniń de eńbek jolymnyń basym bóligi Túrkistanda ótti. Qoja Ahmet ıAsaýı atyndaǵy Halyqaralyq qazaq-túrik ýnıversıtetinde alty jyl eńbek etsem, R.Seıtmetov atyndaǵy sazdy-drama teatrynda da Raıymbek aǵadan tálim alyp, 56 qoıylymnyń mýzykasyna úles qostym. Bul jumystar - men úshin maqtanysh. Túrkistanǵa qansha eńbek sińirsek te artyqtyq etpeıdi»,-dedi sazger Arman Dúısenov.

Aıta keteıik, Túrkistan oblysynan shyqqan óner juldyzdarynyń «TÚRKІSTANDY BІRGE TÚLETEIІK» qaıyrymdylyq kontserti sáýir - jeltoqsan aralyǵynda Túrkistan qalasynda ótip jatyr. Atalǵan shara jergilikti halyq pen qala qonaqtarynyń, sonymen qatar az qamtylǵan otbasylar men múmkindigi shekteýli jandardyń bos demalys ýaqytyn tıimdi paıdalanýǵa úles qosý bolyp tabylady. Elimizdiń rýhanı jáne mádenı astanasy sanalatyn Túrkistan qalasynyń mádenı turǵyda ósip-órkendeýine de birden-bir septigin tıgizeri anyq.