Essentýkıdegi «Qazaqstan» týrıster arasyndaǵy tanymaldyǵyn jylda dáleldep keledi
Shıpajaı jyl saıyn kórsetiletin qyzmetterdi jaqsartý, jańa tehnologııalardy engizý jáne halyqtyń óz densaýlyǵyna degen kózqarasynyń ózgerýi nátıjesinde óziniń mańyzdylyǵyn dáleldep keledi. Sondyqtan da shıpajaı 40 jyldan astam ýaqyt boıy óńirdegi kýrorttyq salada kóshbasshylar qatarynda.
«Biz shıpajaı-kýrorttyq demalystarǵa, joǵary deńgeıdegi osyndaı oryndarǵa degen suranystyń artqanyn baıqap otyrmyz. Bul bir jaǵynan ishki týrızm aǵynynyń artýyna baılanysty. Birneshe jyl qatarynan sheteldik shıpajaılarda demalyp júrgen qonaqtar qazir Kavkaz mıneraldy sýlary aýmaǵyna kelip jatyr. Joǵary talaptarǵa saı bolýy úshin sanatorııler qyzmet kórsetý deńgeıine basa nazar aýdara bastady», - dedi Essentýkı qalasyndaǵy «Qazaqstan» shıpajaıynyń dırektory Eltaı Asqarov.
Onyń aıtýynsha, shıpajaıdyń tanymal bolýyna medıtsınalyq qyzmet sapasy yqpal etip otyr. Bul rette, shıpajaıda balneoterapııa jáne balshyqpen emdeý kezinde qoldanylatyn biregeı protsedýralar eleýli ról atqarady. Saýyqtyrý kýrortyn tańdaý kezindegi adamdar zamanaýı jabdyqtardyń bolýy jáne ınnovatsııalyq qyzmetterdiń engizilýine nazar aýdarady.
«Bıyl ýltradybystyq dıagnostıkaǵa arnalǵan jabdyqtardy jańarttyq. Jańa ýltradybystyq zertteý apparaty emdelýshiniń jaǵdaıy týraly tolyq aqparat alýǵa jáne naqty dıagnoz qoıýǵa múmkindik beretin anyq sýretti qamtamasyz etedi. Sondaı-aq karboksıterapııalyq protsedýralarǵa arnalǵan apparat aldyq. Osy rette, jańa medıtsınalyq qyzmetterdi engizýge jáne saýyqtyrý ári estetıkalyq medıtsına salasyndaǵy qyzmetter paketin keńeıtýge múmkindik berdi», - dep túsindirdi shıpajaı dırektory.
Eltaı Asqarov shıpajaıdaǵy ujymnyń kásibı deńgeıi óte joǵary ekenin aıtty. Olar zamanaýı medıtsınalyq tehnologııany jaqsy meńgergen jáne tájirıbesi mol mamandar retinde tanymal. Onyń sózine qaraǵanda, jyl saıyn «Qazaqstan» mamandary emdeý protsesinde jańa ádisterdi ázirlep, tabysty túrde engizedi. Bıyl qant dıabetimen aýyratyn naýqastardy emdeýge ekpin qoıylyp otyr, sondaı-aq bolashaq analarǵa arnalǵan kómekshi reprodýktıvti tehnologııalar baǵdarlamasyna daıyndyq qarastyrylǵan. Bul ádistemelerdiń biregeıligi aımaqtyń tabıǵı emdik faktorlary men zamanaýı ǵylymı zertteýlerdiń úılesiminde jatyr.
Shıpajaı basshylyǵy barlyq bıznes-protsesti jaqsartýǵa erekshe kóńil bólip otyr. Byltyr qyzmetkerlerdiń jumysyn jáne shıpajaı qyzmetteriniń bir-birimen ózara is-qımylyn jedeldetý men jeńildetýge baǵyttalǵan jańa baǵdarlamalyq tásilder engizildi. Bul óz kezeginde qonaqtarǵa tıimdirek ári jyldam qyzmet kórsetýge múmkindik beredi.
Meımandardy qyzmet kórsetý standarttaryna sáıkes tamaqtandyrý baǵytynda mamandardyń kásibı deńgeıine erekshe kóńil bólingen. Bul rette, daıashylardyń qonaqtarǵa qatysty qarym-qatynasy, qyzmetkerlerdiń syrtqy kelbeti, kásibı standarttardy, sonyń ishinde halyqaralyq standarttardy oryndaý eskerilgen.
«Biz ár ótinishke nazar aýdaramyz. Eger qandaı da bir keleńsiz jaqtary bolsa, men ony marketologpen jáne servıs jetekshilerimen birge jeke ózim retteımin. Únemi qonaqtardy qýantý úshin bıznes-protsesterdi qaıta qaraý jáne jumysymyzdy jaqsartý múmkindikterin pysyqtaımyz. Bıyl saýalnamalardy da qostyq. Bul óz kezeginde qonaqtar jaǵynan bolatyn suranysty tez anyqtap, demalys kezinde jedel sheshýge múmkindik beredi», – dedi Eltaı Asqarov.
Sonymen birge ol shıpajaıǵa kelýshilerge áser etetin taǵy bir faktorǵa toqtaldy. Bul – salaýatty ómir saltyn nasıhattaý, halyq arasynda óz densaýlyǵyna kútimmen qaraý úrdisiniń paıda bolýy. Qazirgi kezde jastar arasynda sanatorııalyq-kýrorttyq demalysqa suranys artqan. Eger osydan birneshe jyl buryn qonaqtardyń ortasha jasy 55-60 jas bolsa, keıingi ýaqytta «Qazaqstan» shıpajaıyna 45-50 jas aralyǵyndaǵy adamdar jıi kelip jatyr. Adamdardy yntalandyrý da ózgerdi. Densaýlyqty saqtaý jáne aýrýlardy erte kezeńde anyqtaý aldyńǵy orynǵa shyqty.
«Bul óńirde básekelestik joǵary deńgeıde. Sondyqtan kýrortta aldyńǵy qatarly saýyqtyrý oryndarynyń biri bolyp qalý úshin zaman aǵymyna ilesip, sál de bolsa ilgeri bolyp, barlyq salany únemi jetildirip, damytý qajet», - deıdi shıpajaı dırektory.