Esirtkimen kúreste naqty nátıjege qol jetkizdik deýge áli erte - Prezıdent

<p>ASTANA. KAZINFORM &mdash; Esirtki máselesi ýshyǵyp barady. Bul týraly Parlament palatalarynyń birlesken otyrysynda Qazaqstan halqyna Joldaýyn jarııalap jatqan Memleket basshysy Qasym-Jomart Toqaev aıtty.&nbsp;</p>

«Taǵy bir mańyzdy mindet – esirtki saýdasyna jáne nashaqorlyqqa qarsy kúres.

Bul – ulttyń genetıkalyq qoryn aman saqtap qalý máselesi degen sóz. Biz osyǵan deıin qajetti zańnamalyq sharalardy qabyldadyq. Biraq naqty nátıjege qol jetkizdik deýge áli erte. Árbir memlekettik qurylym, ásirese, quqyq qorǵaý organdary tıimdi jumys istep jatyr dep aıta almaımyz. Esirtki máselesi ýshyǵyp barady. Biz zań men tártip, bilim men parasat ústemdik etetin qoǵam qurýymyz kerek. Azamattary, ásirese jastary mádenıetti, jańashyl ári jasampaz ulttyń upaıy túgel», - dedi Qasym-Jomart Toqaev.

Sondyqtan Memleket basshysy órkenıetti el bolýǵa kedergi jasaıtyn jaǵymsyz ádetterden arylýymyz kerektigin basa aıtty.

"Men bul týraly Ulttyq quryltaıdyń otyrysynda aıttym. Eldiń bolashaǵyna kesirin tıgizetin bes keselge toqtaldym. Sodan beri birshama jumys atqaryldy. Vandalızmge, lýdomanııaǵa tosqaýyl qoıatyn zańdar qabyldandy. Veıpke, ıaǵnı elektrondy temekige tyıym salyndy. Qabyldanǵan sharalardyń nátıjesi qazirdiń ózinde kórinip jatyr. Áleýmettik keseldiń bárimen tutas jurt bolyp jumyla kúresý qajet», - dedi Prezıdent.