Esirtki qylmysyna qatysty laýazym ıesi ómir boıyna sottalýy múmkin

<p>ASTANA. KAZINFORM &ndash; Esirtki qylmysyna qatystylyǵy dáleldengen laýazymdy tulǵa ómir boıy bas bostandyǵynan aıyrylýy múmkin. Bul jaıynda Májilis depýtaty Ashat Aımaǵambetov Facebook <a href="https://www.facebook.com/askhat.aimagambetov" target="_blank" rel="noopener">paraqshasynda</a> jazdy.</p>

«Májiliste esirtki óndirýshilerine jazany kúsheıtýge baǵyttalǵan mańyzdy zań jobasy talqylanýda. Jazany ómir boıyna bas bostandyǵynan aıyrýǵa deıin qataıtý usynyldy. Bul — ádiletti sheshim. Depýtattar osy normany qoldap daýys berdi. Alaıda, budan da kúrdeli másele bar. Qylmyspen kúresýi tıis azamattardyń ózderi esirtki bıznesine aralasqan kezde ne bolady? Biz quqyq qorǵaý organdarynyń qyzmetkerleri men ózderiniń laýazymyn, qyzmettik múmkindikterin jáne aqparatqa qoljetimdilikti paıdalanyp, esirtki aınalymyna qatysqan ózge de laýazymdy tulǵalarǵa ómir boıyna bas bostandyǵynan aıyrý jazasyn engizý týraly usynys jasadyq», — dedi Ashat Aımaǵambetov.

Onyń atap ótýinshe, eger olardyń kinási dáleldense, mundaı áreketter eń qatań jazalanýy tıis. Sebebi bul — azamattardyń múddesine jasalǵan satqyndyq, qoǵam senimine nuqsan keltirip, eldiń qaýipsizdigine qater tóndiredi.

«Memleket basshylyǵy esirtki bıznesimen jáne onyń taralýymen kúresti ymyrasyz jáne júıeli túrde júrgizýde. Qoǵam úshin úlken qaýip tóndirip otyrǵan osy máseleni joıýǵa baǵyttalǵan esirtkige táýeldilikpen kúres jónindegi keshendi jospar bekitildi. Sonymen qatar, ulttyq qaýipsizdikti nyǵaıtatyn qosymsha sharalar da qabyldanýda», — dedi Májilis depýtaty.