Esil qalasynda tasqynnan zardap shekken 21 otbasy baspanaly boldy
Sý tasqyny kezinde úıi topan sýdyń astynda qalǵandardyń biri Olga Kaılıber 3 aıǵa jýyq kógergen qabyrǵalardy jamaýmen áýre bolǵanyn aıtady.
– Sý basqan ýaqytta kúıeýim ekeýimiz úıde edik. 20-30 mınýttyń ishinde tasqynnyń deńgeıi kóterilip, tizege jetti. Áýpirimdep, qajetimizdi jınap aldyq. Qalǵany jaramsyz bolyp qaldy. Negizi nesıe alyp, osy úıdi qaıta qalpyna keltirýdi oılap júrgenbiz. Endi nesıe alýdyń da, basqa úıge kóshýdiń de qajeti joq, - deıdi ol.
Jasy jetpiske taıaǵan keıýana memleket tarapynan baspanaly bolǵanyna rızashylyǵyn jetkizdi.
– Ne degen záýlim úı. Jap-jaryq. Maǵan qatty unady. Qobaljyp turmyn. Alǵystan basqa aıtarym joq. Alǵashynda senbedik. Kiltti qolyma alyp baqyttan basym aınalyp tur. Qýanyshymyzda shek joq, - deıdi Olga.
Qyzyl kirpishten turǵyzylǵan úıler demeýshi esebinen salynǵan. Óz kezeginde merdiger, bas demeýshi Salamat Ahmetov bul jobaǵa 525 mıllıon teńge ketkenin aıtty.
Saltanatty is-shara kezinde Aqmola oblysynyń ákimi Marat Ahmetjanov sý tasqyny kezinde 188 zardap shegýshige kómek kórsetilgenin atap ótti.
– Esilde tasqyn kesirinen dalada qalǵan 37 otbasy bar. Onyń 19-y aýylda, 18-i qalada turady. On alty otbasy memleket esebinen daıyn páter satyp alýdy jón kórdi. Jalpy, 188 zardap shegýshige áleýmettik kómek kersetildi. Osylaısha jurt qalypty ómirge qaıta kóshken. Tek qana merzimin emes, sapasyn da qadaǵalap otyrdyq. Halyq qonystanǵan soń narazylyq bolmasyn dep bárine erekshe kóńil bóldik. Qoǵamdyq baqylaý da boldy. Mysaly, ishtegi peshterdiń ornatylýyna, bólmelerdiń josparyna turǵyndar óz pikirin qosty, - dedi M. Ahmetjanov.
Bir úlgide salynǵan úılerdiń ishi keń, 85 sharshy metr. Jer telimi – on sottyq. Al, otbasy múshelerine baılanysty bólmelerdiń ornalasýy ártúrli. Maýsynyń 1-inde bastalǵan qurylys 100 kúnde aıaqtaldy.