Eskirgen avtobýstar men júrgizýshi tapshylyǵy – Qaraǵandy avtoparkteriniń basty problemasy

QARAǴANDY. QazAqparat – Qaraǵandylyq avtopark basshylary qoǵamdyq kólikte saralanǵan tarıf engizilgennen keıin ne ózgergenin oblys ákimine baıandady. Olardyń aıtýynsha, avtobýs júrgizýshileri keste boıynsha jumys istep jatyr, jolaýshy jınaımyz dep jarysýdy da doǵarǵan.

Óńir basshysy turǵyndardan avtobýs jumysyna qatysty shaǵymdar áli de kóp túsip jatqanyn atap ótti.

Qaraǵandylyqtar qoǵamdyq kólikti uzaq kútetinine jáne salondardyń lyq toly bolatynyna narazylyq bildirgen.

Oblysta 203 turaqty marshrýt jumys isteıdi. 39 tasymaldaýshy qyzmet kórsetedi, avtoparkterinde 900-den astam avtobýs bar.

«Bıyl pandemııaǵa baılanysty jabylǵan jeti aýdanaralyq baǵytta qozǵalys qalpyna keldi. Seriktes qalalar Temirtaý, Shahtınsk, Saran, Abaı qalalary, sondaı-aq Topar jáne Shahan kentteri baǵytyndaǵy alty aýdanaralyq marshrýttarmen qamtylǵan. Jyl saıyn osy marshrýttarda 5,5 mıllıonnan astam adam tasymaldanady. Jelide № 3 jáne 5 avtoparkter jumys isteıdi», – dedi jolaýshylar kóligi jáne avtomobıl joldary basqarmasynyń basshysy Sábıt Ospanov.

Ol sondaı-aq avtobýstardyń jelige shyǵýyna kúndelikti baqylaý júrgizilip jatqanyn atap ótti.

Jolaýshylar Bus09 qosymshasy arqyly naqty ýaqyt rejıminde qala mańyndaǵy avtobýs qozǵalysyn baqylaı alady.

Osy jyldyń qyrkúıek aıynda Qaraǵandy – Abaı baǵyty boıynsha «Mersedes» markaly 10 avtobýs iske qosyldy.

Qaraǵandy – Temirtaý jáne Qaraǵandy – Shahan baǵyttarynda áli de túıtkildi máseleler barshylyq.

Bul problemalarǵa sebep - kólikterdiń eskirýi jáne júrgizýshi jetispeýshiligi.

Qaraǵandyda 224 bos jumys orny bar. Kólikti jańartýǵa keletin bolsaq, № 5 avtopark ónerkásipti damytý qoryna 58 jańa avtobýs – 50 qalalyq jáne 8 qala mańyndaǵy avtobýs satyp alýǵa ótinim berdi.

№ 3 avtopark kelesi jyly 30 jańa avtobýs satyp almaqshy.

«Jolaýshylar tarapynan shaǵymdardy qadaǵalap, jedel áreket etý qajet. Avtokólik kombınattary búkil mindettemelerin oryndaýy tıis. Ótken jyly jáne bıyl biz sýbsıdııany edáýir arttyrdyq. Kólikti jańartý, elektrondy bıletti engizý – munyń bári servısti jaqsartýǵa baǵyttalǵan», – dep atap ótti Jeńis Qasymbek.

Alaıda shaǵymdar tek tasymaldaýshylarǵa ǵana qatysty emes. Qoǵamdyq kólikte jolaqy tólemeıtinder kóbeıip ketti.

Qazir Qaraǵandyda № 3 avtoparktiń 50 baqylaýshysy jáne eBay kompanııasynyń 30 baqylaýshysy jumys isteıdi.

Ázirge olar jolaýshylarǵa jol júrý jaýapkershiligi týraly eskertý jasap jatyr.

Jeltoqsan aıynda sózden áreketke kóshedi. Baqylaýshylar polıtsııa qyzmetkerlerimen birge shyǵyp, jolaqy tólemegenderge aıyppul salady.