Eski 500 teńgelikter 10 maýsymnan keıin jaramsyz bolady
«Búgingi kúni 2006 jylǵy 500 teńgelik banknottar jańasymen birge aqsha aınalymynda júr, ol zańdy tólem quraly bolyp tabylady, Qazaqstanyń barlyq aýmaǵynda tólemder men aqsha aýdarymdary úshin qabyldanýǵa tıis»,– dep habarlady Ulttyq banktiń baspasóz qyzmeti.
2020 jyldyń 10 maýsymyna deıin tólem quraly retinde eski úlgidegi banknottardy qabyldaýdan bas tartýǵa jol berilmeıdi. Banknot pen monetalardy qabyldaıtyn zańdy tólem quraly avtomattar da eski 500 teńgelikti qabyldaýdan bas tartýy QR Ákimshilik quqyqbuzýshylyq týraly kodeksiniń 206-babyn buzýǵa ákelip soǵady.
Eski jáne jańa úlgilerdegi banknottardyń qatar aınalysy kezeńinde 2006 jylǵy úlgidegi nomınaly 500 teńgelik banknottardy qabyldaýdan bas tartý faktileri týyndaǵan jaǵdaıda, tıisti sharalar qabyldaý úshin Ulttyq bank tıisti shara qoldanady.
2020 jyldyń 10 maýsymnan keıin (kezeń aıaqtalǵan soń) ekinshi deńgeıdegi bankter qatar aınalys kezeńi aıaqtalǵan kúnnen bastap 12 aı ishinde eski úlgidegi banknottardy qabyldaıdy jáne qoldanystaǵy aqsha belgilerine aıyrbastaıdy;
Ulttyq Banktiń fılıaldary ekinshi deńgeıdegi bankterdiń qabyldaý jáne aıyrbastaý merzimi aıaqtalǵan soń taǵy 3 jyl ishinde eski úlgidegi banknottardy qabyldaıdy, sondaı-aq olardy jańa úlgidegi aqsha belgilerine aıyrbastaıdy.
Osylaısha, 2020 jyldyń 10 maýsymnan keıin 2006 jylǵy úlgidegi nomınaly 500 teńgelik banknottar zańdy tólem quraly bolyp tabylmaıdy.
Sonymen birge, 2017 jylǵy úlgidegi nomınaly 500 teńgelik banknottar aınalysta bolady jáne tólemderdiń barlyq túrleri boıynsha Qazaqstan Respýblıkasynyń búkil aýmaǵynda kórsetýli quny boıynsha, sondaı-aq bank shotyna esepke alý jáne aýdarý úshin qabyldaýǵa, barlyq bankter men Ulttyq poshta operatory shektemesten usaqtaýǵa jáne aıyrbastaýǵa mindetti bolyp qala beredi.