Eskertý: Almatyda kún 36 gradýsqa deıin ysıdy

<p>ALMATY. KAZINFORM — Almaty qalalyq tótenshe jaǵdaılar departamenti aptap ystyqqa baılanysty turǵyndarǵa eskertý jasady.</p>

«Qazgıdromet» sınoptıkteriniń málimetinshe, 26 maýsym kúni Almatyda synap baǵanasy 36 gradýsqa deıin kóteriledi.

Osyǵan baılanysty Almaty qalasy tótenshe jaǵdaılar departamenti tómendegi qaýipsizdik sharalaryn saqtaýdy usynyp otyr:

— Kún sáýlesi tikeleı túsetin jerlerde múmkindiginshe az bolýǵa tyrysyńyz; 
— Saǵat 12:00–den 16:00–ge deıingi ýaqytta kúnniń sáýlesi belsendi bolatynyn umytpańyz. Deneni kún sáýlesinen qorǵap, jabyq kıim kııýge tyrysyńyz jáne kúnnen qorǵaıtyn syqpa maılar qoldanyńyz;
— Alkogoldi ishimdik ishpeńiz — alkogol ystyqta aǵzaǵa tez áser etedi jáne dene joǵary temperatýraǵa sezimtal bolady;
— Suıyqtyqty (salqyndatylǵan sý, mıneraldy sý) múmkindiginshe kóp ishýge tyrysyńyz;
— Denege salmaq túsirmeńiz. Kúshti júkteme ystyqta jylý almasýdy arttyrady da aǵzany sýsyzdanýǵa ákelip soqtyrady;
— Kólikpen uzaq saparlarǵa shyqpaǵan abzal.

Osyǵan deıin «Qazgıdromet» RMK bas dırektorynyń birinshi orynbasary Serik Saıyrov maýsymnyń sońǵy kúnderi kún raıy qandaı bolatynyn aıtqan bolatyn.