Eskertkish, týrnır, kitap: Denıstiń esimin esten shyǵarmas úshin ne jasalady?

ALMATY. QazAqparat - Almaty ákimi qyrshynynan qıylǵan sportshy Denıs Tenniń rýhyna taǵzym retinde qalada qandaı nysandar paıda bolatynyn aıtty, dep habarlaıdy QazAqparat tilshisi.

Qala ákimi Almatyda mánerlep syrǵanaýdan Denıs Ten atyndaǵy týrnır uıymdastyrylatynyn aıtty. 

«Denıs Tenniń qazasy búkil qazaqstandyqtardy dúrliktirip qana qoımaı, biriktirdi. Men Denıstiń ata-anasymen eki ret áńgimelestim. Aldyńǵy kúni taǵy da júzdestim. Qala ákimdigi mánerlep syrǵanaýdan Denıs Ten atyndaǵy týrnır uıymdastyratyn boldy. Halyqaralyq dodaǵa jas sportshylar qatysady. Almaty - qysqy sporttyń ortalyǵy. Sondyqtan, bul týrnır qalaǵa kerek», - dedi B.Baıbek.
Sonymen qatar, Denıs Tenniń rýhyna arnap sportshy kóz jumǵan jerge eskertkish ornatylady. 

«Biz eskertkishtiń eń ozyq úlgisin anyqtaý úshin músinshiler arasynda baıqaý jarııalaımyz. Qazir osy baǵytta Denıs Tenniń týystarynyń qatysýymen komıssııa quryldy», - dedi ákim.

Sondaı-aq, Denıs Ten týǵan úıge eskertkish taqta ornatylyp, kitap jazylady. 

«Týysqandarynda Denıs Ten týraly barlyq málimet bar. Ony kitap etip jazý úshin barynsha qarjylyq kómek kórsetemiz. Osy máselelerdiń barlyǵy meniń jeke baqylaýymda bolady», - dedi ákim.

Munyń aldynda Denıs Tenniń anasy QR mádenıet jáne sport mınıstrligi mánerlep syrǵanaý akademııasyn ashýdy josparlap otyrǵanyn aıtqan bolatyn.