Eski qazandyq esti shyǵardy: ShQO-daǵy aýyl mektebi peshke jarymaı otyr

<p>Shyǵys Qazaqstan oblysy Samar aýdany Marınogorka aýylyndaǵy mektep 2 qazandyqpen jylytylady. Alaıda ekeýiniń de tozyǵy jetken. Aýyl turǵyndary jergilikti ákimdikke eskini jóndeýdiń ornyna, jańasyn alý qajettigin aıtqanymen, olardyń ótinishi oryndalmaı tur, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Marınogorka orta mektebi 1977 jyly salynǵan. Sol ýaqyttan bastap kúni búginge deıin bul bilim ordasyna kúrdeli jóndeý jumystary júrgizilmegen. Aýyl turǵyndarynyń aıtýynsha, ásirese kúz ben qys aılarynda ǵımarat ishin jylytatyn 2 qazandyqtyń jaǵdaıy múshkil. Búginde mektepte barlyǵy 104 oqýshy bilim alady.

«Qazandyqtar tozyp tur. Ony qaıta-qaıta jóndeı bergennen góri jańasyn alý qajet. Mekteptiń syrty da qara kúıe boldy. Byltyr qazandyqqa qabyrǵalas turǵan birneshe synypqa tútin kirdi. Oqýshylarǵa ıis tıip qalmas úshin mektep basshylyǵy bul synyptardy jaýyp tastady. Barlyǵy 3 kabınet jabylǵan», - dep shaǵymdandy olar.

Foto: «Samar tynysy» gazeti

Anyq-qanyǵyn bilý úshin Samar aýdanynyń ákimdigine habarlastyq. Belgili bolǵandaı, bıyl qazandyqtardy jóndeýge 4,2 mln teńge bólingen.

«Negizi jóndeý jumystary 15 qazanǵa deıin aıaqtalady dep josparlaǵan edik. Biraq osydan birneshe kún buryn tolyqtaı aıaqtaldy. Sorǵyny, qazandyqtyń kirpishterin, jeldetý júıesin aýystyrdyq. Budan bólek, bıyl mektep ǵımaratynyń birinshi qabatyndaǵy terezeler aýystyryldy. Bul maqsatta 16 mln teńge jumsaldy», - dep habarlady aýdandyq bilim bóliminen.

Marınogorka orta mektebine jańa qazandyq alýdyń josparda bar-joǵyn Shyǵys Qazaqstan oblystyq Bilim basqarmasynyń basshysy Innesa Chernyshevadan surap kórdik.

«Bul máseleden habardarmyz. Bıyl jóndeý jumystary júrgizildi. Al kelesi jyly mektepke jylý ortalyǵyn salý josparda bar», - dep jaýap berdi ol.

Foto: «Samar tynysy» gazeti