Eski karton qorapty óner týyndysyna aınaldyramyn – sýretshi
22 jastaǵy Raýaj Jarylqasynovtyń aıtýynsha, otbasynda ónerge jaqyn eshkim joq. Sýret salýǵa degen qyzyǵýshylyǵy bala kúninde bastalǵan. Áýelde teledıdardan ózine unaǵan mýlfılm keıipkerlerin qaǵazǵa túsirip júrgen.
«Men 7-8 jasymnan bastap sýret salýdy úırendim. Ol kezde telefon, ınternet, tıktok degender bolmady. Teledıdardan ártúrli mýltfılmder men kınolarǵa qarap sol jerde unaǵan keıipkerlerdi kishkentaı paraqqa qalammen keskindep júrdim. Keıin sýret salýdyń túrli tásilin óz betimshe úırendim», - deıdi ol.
Raýajdyń sózinshe, sýret ónerindegi basty qaǵıdasy – erkin ıdeıa.
«Únemi izdenis ústinde júremin. Sýret ónerindegi basty qaǵıdam – erkin ıdeıa. Beıneleý ónerinde portret – kúrdeli janr. Sondyqtan ózimdi osy salada synap kórgim keldi. Osylaısha, kartonnan adamdardyń portretin jasaýǵa kiristim. Ony ınternet arqyly úırendim», - deıdi erekshe týyndylardyń avtory.
Onyń aıtýynsha, Dinmuhamed Qonaev, Dımash Qudaıbergen, Vıktor Tsoıdyń qatty qaǵaz qıyndylarynan jasalǵan portreti áleýmettik jelilerdegi paraqshasynda kóp qaralym jınaǵan.
«Kóbine týyndynyń jasalý barysymen áleýmettik jelide bólisemin. Bir aı buryn tiktok paraqshamda belgili fýtbolshynyń portretin qalaı jasaǵanymdy kórsettim. Sol vıdeo kóp adamǵa unady. Maǵan alǵystaryn jetkizip, shyǵarmashylyq tabys tiledi. Bul meni shabyttandyrdy», - deıdi ol.
Sýretshi qazir Almatyda joǵary oqý oryndarynyń birinde keskindeme fakýltetinde oqyp jatqanyn aıtty.
«Densaýlyǵyma baılanysty mektepti 20 jasymda támamdadym. Qazir Abaı atyndaǵy Qazaq ulttyq pedagogıkalyq ýnıversıtetiniń ekinshi kýrs stýdentimin. Keskindeme fakýltetinde bilim alyp jatyrmyn. Qolym bos kezde eski karton qorapty óner týyndysyna aınaldyramyn. Oǵan karton, burandalar, jelim ǵana qajet», - dep atap ótti Raýaj Jarylqasynov.
Áleýmettik jelide 1 mln-nan astam oqyrmany bar jas sýretshiniń armany bolashaqta óziniń jeke kórmesin ótkizý.