Eski de bolsa qymbat: Aqtóbede jarty ǵasyr buryn salynǵan mýzyka mektebine kúrdeli jóndeý qajet
Aqtóbe qalasyndaǵy №2 mýzyka mektebi 1970 jyly salynyp, sodan beri kúrdeli jóndeý jumystary júrgizilmegen. Mundaǵy esik-terezeniń bári eski, edeni de syqyr-syqyr etedi. 200-den astam bala tárbıelengenimen, alaqandaı ǵana bólmelerde dombyra, qobyz, skrıpka, baıan tartyp úırenip, án salýǵa májbúr. Olarǵa 30-40 jyldyq tájirıbesi bar mamandar dáris beredi. Sondyqtan bolar buryn ózi oqyǵan mýzyka mektebine nemeresin tasyp júretin áje-atalar da kezdesedi.
«Bizge bul jer unaıdy. Sebebi biz Aqtóbe qalasynyń Turǵyndar qalashyǵy aýdanyna qyzmet kórsetemiz. Ǵımaratymyz beıimdelgen nysan. Balalarymyz syıyp júrip. Munda 239 bala bar. Sonymen birge qalanyń Sút zaýyty aýdanyndaǵy №72 mektepte fılıalymyz ashylyp, dombyra kýrsy jumys istep tur. Osy ǵımaratqa syımaǵandary sonda barady. Negizi bári sol mekteptiń oqýshylary, al muǵalim bizdiń mýzyka ortalyǵynan barady. Onda 20-dan astam bala bar. Bıyl mýzyka mektebine ónerge jaqyn 52 bala 8 bólimge qabyldandy. Olar dombyra, qobyz, fortepıano, vokal, baıan, akkardeon, gıtara, skrıpka úıirmelerin tańdady. Ǵımarat eski bolǵanymen, orny ózgermegenin qalamaımyz. Bul aýdanda mundaı óner ordasy joq desem bolady. Muǵalimderi de tájirıbeli. Kóbi 30-40 jyldan beri eńbek etip keledi. Munda kelip júrgen balalardyń ata-analary, ata-ájeleri osy jerde tálim alǵan», - dedi №2 mýzyka mektebi dırektorynyń orynbasary Elena Bondarenko.
Taıaýda dombyra, gıtara, qylqobyz, baıan, akkardeon satyp alyndy. Al fortepıano barlyq synyp ishinde tur.
«Ǵımarattyń jalpy aýdany 280 sharshy metr bolady. Úıirmeler aqyly, biraq óte arzan. Bizde eń qymbaty 5700 teńge, al arzany 3200 teńge. Bir otbasynda 2-3 bala kelip, oqý aqysynyń tek teń jartysyn tóleıdi. Mundaǵy shaǵyn sahnada eki roıal tur. Ekeýi de kontsertke arnalǵan. Bul aspap mektebimizdiń maqtanyshy desek te bolady. Mundaıdy qazir tappaısyz. Zamanaýı aspaptar jaqsy bolǵanymen, bul oblys boıynsha bizde ǵana bar. Muny mýzyka mektebine kirgizý úshin sarbazdar kelgen eken. Týra esikti alyp tastap, ishke kirgizdi», - dep eske aldy №2 mýzyka mektebi dırektorynyń orynbasary Elena Bondarenko.
Munda barlyǵy 42 shtattyq oryn bar. Ustazdardyń teń jartysy turaqty eńbek etse, ózgesi qosymsha dáris beredi. Kishi qyzmetkerleri jyl saıyn shaǵyn jańartý jumysyn júrgizedi. Bıyl dálizdiń tusqaǵazyn aýystyrǵan. Sonymen birge mekteptiń shamy aýystyryldy. Beınebaqylaý kamerasy bar.
«Men ózim oblystyq fılarmonııada jumys istep, munda dombyradan sabaq beremin. Jumys istep júrgenimen 10 jylǵa jýyqtady. Qazir úıirmege 10 bala qatysady. Jyl saıyn 3-4 bala qatarǵa qosylady. Bıyl mýzyka mektebi aspap satyp aldy. Al ǵımaratqa keler bolsaq, jańa mektep bolsa, jaqsy bolar edi. Eski bolǵan soń ata-analarǵa qıyn. Qysta dalada kútip qalady. Munda kútý orny joq», - dedi dombyra klasynyń jetekshisi Altynaı Salımbaeva.