Esirtkini ınternet arqyly satýdyń 153 faktisi tirkeldi

NUR-SULTAN. QazAqparat – Bıyl esirtkini ınternet arqyly satýdyń 153 faktisi tirkeldi. Bul týraly QR Іshki ister mınıstrligi Esirtki qylmysyna qarsy is-qımyl departamentiniń ókili Danııar Oralov aıtty, dep habarlaıdy QazAqparat tilshisi.

«Mamandarymyz esirtki zattaryn taratý týraly aqparatty qamtıtyn saıttardy, jazbalardy, blogtardy jáne jarnamalardy anyqtaý úshin ınternet keńistigine monıtorıng júrgizedi. Esirtki zattaryn zańsyz jarnamalaý nemese nasıhattaý boıynsha 76 sotqa deıingi is, olardy ınternet arqyly ótkizý boıynsha 153 qylmystyq is tirkeldi. Áleýmettik jelilerge júrgizilgen monıtorıng barysynda esirtki men psıhotroptyq zattardyń taralýyna qatysy bar 1 606 veb-saıttar, akkaýnttar jáne basqa da resýrstar anyqtalyp, buǵattaldy», - dedi departament ókili mınıstrliktiń baspasóz qyzmeti alańynda ótken brıfıngide.

Osy oraıda, Danııar Oralov ata-analarǵa balalarynyń bos ýaqytyn qalaı ótkizetinine jáne kimmen sóılesetinine muqııat bolý qajettigin eskertti.

«Óıtkeni, olar zańsyz esirtki bıznesine tap bolýy múmkin», - dedi ol.