Esirtki satýmen aınalysqan túrkistandyq kelinshek 10 jylǵa bas bostandyǵynan aıyryldy

TÚRKІSTAN. QazAqparat – 48 jastaǵy kúdikti áıelge qatysty sot úkimi shyqty. Ol QR QK 297-babynda kózdelgen qylmysty jasaǵany úshin kináli dep tanyldy, dep habarlaıdy QazAqparat tilshisi.

Túrkistandyq polıtseıler kúdiktiniń Saıram aýdanynda 5 gramnan asatyn marıhýanasy bar sirińke qorapshasyn satqanyn anyqtaǵan bolatyn. Sodan keıin, jedel ýákilder Shymkent qalasyndaǵy jaldamaly páterinen sıntetıkalyq «pırrolıdınovalerofenon» preparatyna uqsas eki polıetılen túıinshegin tárkiledi. Saraptamaǵa sáıkes, zattaı dálel retinde alynǵan esirtkiniń salmaǵy 5 gramnan asty.

«Atalǵan jaıt QR QK-niń 297-babynyń 3-bóligi «Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, satyp alý, saqtaý, tasymaldaý, jóneltý nemese ótkizý» boıynsha tirkeldi. Kúdiktige qatysty sotqa deıingi tergeý kezinde jınaqtalǵan materıaldar zańdy sheshim qabyldaý úshin sotqa jiberildi» - delingen Túrkistan oblysy polıtsııa departamentiniń baspasóz qyzmeti taratqan habarlamada.

Al, sot úkimimen 48 jastaǵy kúdikti QR QK 297-babynda kózdelgen qylmysty jasaǵany úshin kináli dep tanylyp, 10 jylǵa bas bostandyǵynan aıyryldy.