Esirtki satý ústinde ustalǵan taldyqorǵandyqtan qarý da tárkilendi

TALDYQORǴAN. QazAqparat - Taldyqorǵanda esirtki saýdasymen aınalysatyndardy ustaý operatsııasy kezinde qolǵa túsken kúdiktiden qarý men oq-dáriler de tárkilendi, - dep habarlaıdy QazAqparat tilshisi.

Operatsııa barysynda 31 jastaǵy esirtki satýshy saýda júrgizip turǵan jerinen ustaldy. Ol «Shyǵys» shaǵyn aýdanynda psıhotroptyq «mefedron» zatynyń birneshe dozasyn ótkizip jatqan. Kúdiktiniń turǵylyqty jeri boıynsha sanktsııalanǵan tintý kezinde osy preparattyń taǵy 80 gramy tabyldy.

Sondaı-aq, sıntetıkalyq esirtkiden basqa, qarý-jaraq pen oq-dáriler arsenaly tárkilendi.

«Kúdiktiniń úıinen TOZ-8, 5, 6 mm kalıbrli bir uńǵyly myltyq, IJ-K bir uńǵyly myltyq, 16 kalıbrli myltyq jáne 20-dan astam patron tabyldy. Qarý tirkelmegen jáne erekshe nómirleri joq», - deıdi Almaty oblystyq Polıtsııa departamentiniń baspasóz qyzmeti.

Tártip saqshylary arnaıy operatsııany Ulttyq qaýipsizdik komıtetiniń qyzmetkerlerimen birlese júrgizdi.

Eske salsaq, Almatyda esirtki daıyndap, saqtaǵan «Mad Men» tobynyń músheleri sottaldy.