Esirtki, psıhotroptyq zattar men olardyń prekýrsorlaryn Keden odaǵynyń keden aýmaǵy arqyly ótkizý tártibi týraly kelisim zańmen bekitildi
Kelisimniń maqsaty týraly QR Іshki ister mınıstri Qalmuhanbet Qasymov baıandap berdi. Májilistiń Halyqaralyq ister, qorǵanys jáne qaýipsizdik komıtetiniń múshesi Qaıyrbek Súleımenov qosymsha baıandama jasady.
Atalǵan kelisim 2013 jylǵy 24 qazanda Mınskide jasaldy.
Kelisimde esirtki, psıhotroptyq zattar men olardyń prekýrsorlaryn, atap aıtqanda, zańdy tulǵalardyń Taraptar arasynda saýdany júzege asyrý kezinde, klınıkalyq zertteýler, saraptama, memlekettik tirkeý jáne sapa baqylaýyn júrgizý úshin, sondaı-aq jekelegen kólik túrlerindegi alǵashqy kómek kórsetýge arnalǵan dári qobdıshalarynda, jeke tulǵalardyń jeke óziniń paıdalanýy úshin ótkizý jáne tasymaldaý tártibi aıqyndalady.
Kásipkerlik qyzmet sýbektileri retinde tirkelgen jeke tulǵalarǵa olar kórsetilgen qyzmetti júzege asyrýyna baılanysty esirtki, psıhotroptyq zattar men olardyń prekýrsorlaryn ótkizýdi, sondaı-aq tasymaldaýdy júzege asyrýǵa tyıym salynady.
Taraptardyń quzyretti organdary beretin ákelýge jáne áketýge arnalǵan ruqsat berý qujattary bolǵan kezde zańdy tulǵalar mundaı zattardy ótkizýdi júzege asyrady.
Esirtki, psıhotroptyq zattar men olardyń prekýrsorlaryn ákelýge, áketýge ruqsat berý qujattaryn quzyretti organdardyń berý tártibi, sondaı-aq ruqsat berý qujattarynyń nysandary aýmaǵynda ótkizýdi júzege asyratyn zańdy tulǵa tirkelgen Tarap zańnamasynda aıqyndalady.
Májilis maquldaǵan atalǵan zań jobasy Senattyń qaraýyna jiberildi.