Esirtki qylmysyna barǵan 25 jasóspirim ustaldy - ІІM

ASTANA. QazAqparat – Ótken jyly esirtki qylmysyna barǵan 25 jasóspirim ustaldy. Bul týraly ІІM Esirtki qylmysyna qarsy is-qımyl departamentiniń ókili Danııar Oralov aıtty, dep habarlaıdy QazAqparat tilshisi.

«Esirtki dıllerleri OLX, HeadHunter sııaqty jarnama saıttarynda jastardy «baı bolasyń» dep esirtki jasyrý jumysyna baýrap alady. «Az ýaqytta aqshaǵa kómilesiń», «kez-kelgen ýaqytta bul bıznesten shyǵa alasyń» dep jelpindiredi. 2022 jyly esirtki tasymaldaýmen, ony jasyrýmen jáne saqtaýmen aınalysqan kámeletke tolmaǵan 25 jasóspirim ustaldy. Balalyqpen, bilmestikten mundaı qadamǵa bardy dep aqtaýǵa bolatyn shyǵar, biraq zań – barlyǵyna ortaq. Qylmystyq jaýapkershilik 14 jastan bastalady», - dedi ol mınıstrliktiń baspasóz qyzmeti alańynda ótken brıfıngte.

Onyń dereginshe, esirtki saqtaǵandarǵa, ony taratýmen aınalysqandarǵa jaza aýyr. Qylmystyq kodekstiń 296, 297-babtaryna sáıkes, 3 jyldan ómir boıyna deıin bas bostandyǵynan aıyrý kózdelgen.

«Sondyqtan ata-analar balalaryńyzdyń nemen aınalysatynyn, kimmen aralasatynyn únemi tekserip, baqylap otyrý kerek», - dedi Danııar Oralov.