Esirtki bıznesimen kúreste ІT-mamandar quramy kúsheıtilip jatyr

NUR-SULTAN. QazAqparat – QR Іshki ister mınıstrligi esirtki bıznesimen kúres baǵytynda ІT-maman shtatyn kúsheıtýde. Bul týraly depýtattyq saýalǵa jaýap bergen QR Premer-Mınıstri Asqar Mamın málim etti, dep habarlaıdy QazAqparat tilshisi.

Esirtkini aqparattyq-kommýnıkatsııalyq jeliler arqyly taratý zańsyzdyqtaryna tosqaýyl qoıý máselesine toqtalǵan Úkimet basshysy, «esirtki bıznesimen kúrestiń tıimdiligin kóterý maqsatynda tıisti bólimshelerdi tájirıbeli mamandarmen tolyqtyrý boıynsha sharalar qabyldanýda. Osy oraıda ІT-tehnologııa salasynda bilimi ári ınternet jelisiniń kóleńkeli segmentterimen jumys daǵdysy bar adamdar qamtylady» dedi.

Onyń sózine qaraǵanda, tıisti mınıstrlikter aqparattyq keńistikti monıtorıngileý barysynda bıyl 450-ge tarta esirtki saıttary buǵattaldy.

Sonymen qatar, esirtkini nasıhattaýmen aınalysqan 300-den astam ınternet-resýrstarǵa shekteý engizildi.

Munymen qosa Premer-Mınıstr anonımdi paıdalanýshylar paıdasyna elektrondy qarjyny aýdarýǵa tyıym salý men elektrondy aqshaǵa qatysty kúmándi operatsııalardy toqtatý boıynsha zańnamalyq túzetýlerdiń eki paketi ázirlengenin aıtty.