Esimov ulttyq kompanııa qyzmetkerleriniń qomaqty bonýstaryn túsindirdi

NUR-SULTAN. QazAqparat – «Samuryq-Qazyna» Ulttyq ál-aýqat qory» AQ basqarmasynyń tóraǵasy Ahmetjan Esimov ulttyq kompanııa qyzmetkerlerine bonýs qalaı eseptelinetindigin túsindirdi, dep habarlaıdy QazAqparat tilshisi.

«Bonýs anyqtalatyn sálette korporatıvtik basqarý bolady. Eń aldymen KPI (Key Performance Indicators – tıimdiliktiń negizgi kórsetkishteri) belgilenetin birneshe sanat bar. Eger sol KPI 20, 30 paıyzǵa jáne odan kóp paıyzǵa oryndalsa, munyń barlyǵy esepke alynady. Sodan keıin baryp Dırektorlar keńesi bonýsty bekitedi», - dedi Ahmetjan Esimov Úkimet otyrysynan keıin BAQ ókilderiniń saýalyna oraı.

Onyń atap ótýinshe, qyzmetkerlerdi sapaly jumys isteýge yntalandyrý úshin bonýs qajet.

«Bul kompanııalarda jumys isteý ońaı emes. Olar bizdiń jetekshi kompanııalarymyz. Sondyqtan ol jerde óte jaqsy mamandar bolýy tıis. Sebebi jaqsy mamandar óte úlken paıda ákeledi. Atalǵan kompanııalarda kásibı mamandardyń jumys isteýiniń arqasynda biz jaqsy tabysqa jetip otyrmyz», - dedi qor basshysy.

A.Esimovtiń sózine qaraǵanda, jasalǵan jumysqa aýdıt júrgizilgennen keıin ǵana qyzmetkerlerge bonýs beriledi.