Esil ózeninde vokzal ashylady

ASTANA. QazAqparat - Kelesi jyly elordanyń Esil ózeninde vokzaly paıda bolady. Sondaı-aq ózendegi taksı qyzmetin de iske qosý josparlanǵan, dep habarlaıdy Astana ákimdiginiń medıa ortalyǵy.

«2008 jyly Elbasynyń tapsyrmasyna sáıkes «Esildegi keme arnasyn damytý» jobasy ázirlendi. Búginde atalǵan joba úsh baǵyt boıynsha júzege asyrylýda. Sonyń biri - Esildegi kemejaı, ıaǵnı ózen vokzalyn ashý. Qazirgi kúni kemejaı qurylysynyń naqty orny belgilendi, ol Sh.Beısekova kóshesiniń tómengi jaǵynda bolmaq», - dedi Astana ákimdiginiń medıa ortalyǵynyń tilshisine bergen suhbatynda «Astana Esil» MKK dırektory Qanat Alın.

Onyń aıtýynsha, ózen vokzaly porttyq krandarmen, bloktarmen  jáne qajetti sheberhanalarmen jabdyqtalady.

«Sondaı-aq  2015 jyly shildede Esil ózeni Qazaqstannyń keme júzetin ózenderiniń tizilimine engizildi. Sondyqtan, biz bul jańalyqpen maqtana alamyz. Jobanyń taǵy bir maqsaty - Esil ózeninde qatynaıtyn ózen taksıin qoldanysqa engizý. Syıymdylyǵy 8  adamdyq shaǵyn kemeler jolaýshylardy Esil ózeniniń akvatorııi sheńberinde qalaǵan jerine jetkizetin bolady», - dedi ol.