Esikti buzyp kirip, órtten otbasyn qutqarǵan elordalyq polıtseıler marapattaldy
«Búgin Nur-Sultan qalalyq Polıtsııa departamentiniń bastyǵy QR Іshki ister mınıstriniń atynan órtten adamdardy qutqarǵan Patrýldik polıtsııa polkiniń ınspektorlary aǵa leıtenanttar Erlan Qataev pen Asan Baltabaevty «Quqyq tártibin qamtamasyz etýge qosqan úlesi úshin» medalimen marapattady. Marapattaý sharasyna keshe tańerteń polıtsııa qyzmetkerleri órtenip jatqan úıden qutqaryp alǵan otbasy shaqyryldy. Polıtsııa general-maıory Erjan Sádenov otbasyn kelgen Jańa jylmen quttyqtady, zor densaýlyq, baq-bereke tilep, balalarǵa syılyqtar tartý etti. Otbasynyń otaǵasy jaqyndaryn qutqarǵany úshin polıtsııa qyzmetkerlerine júrekjardy izgi tilegin jetkizdi», - delingen departament taratqan aqparatta.
Vedomstvo málimetinshe, polıtsııa qyzmetkerleriniń úılesimdi ári batyl is-áreketteriniń arqasynda tótenshe jaǵdaı kezinde adam shyǵyny bolǵan joq. Elorda polıtsııasynda azamattarǵa kómek qolyn sozýǵa daıyn naǵyn kásibı qyzmetkerler jumys isteıdi. Olar qala turǵyndarynyń tynyshtyǵyn qorǵap, quqyqtyq tártipti qamtamasyz etý úshin tynbaı eńbek etýde.
Eske salaıyq, keshe, 5 qańtarda elordalyq eki polıtseı jer úıden shyqqan órtti alystan baıqap, oqıǵa ornyna dereý jetken. Úıdiń esigin buzyp kirip, áıeldi jáne onyń 15, 13 jáne 9 jastaǵy úsh balasyn qutqaryp qaldy.