«Esik», «Berel» jáne «Shilikti» vızıt ortalyqtary salynady

NUR-SULTAN. QazAqparat - 2021 jyldan bastap «Esik», «Berel» jáne «Shilikti» vızıt ortalyqtary jumysyn bastaıdy. Bul jańalyqty Mádenıet jáne sport mınıstri Aqtoty Raıymqulova málim etti, dep habarlaıdy QazAqparat tilshisi.

«Elimizdiń barlyq jetekshi mýzeı qoryqtarynyń aýmaǵynda vızıt ortalyqtardyń qurylysy, mýzeıfıkatsııa jumystary júrip jatyr. Ótken jyly Túrkistan oblysyndaǵy «Otyrar» jáne Almaty oblysyndaǵy «Tańbaly» vızıt ortalyqtarynyń qurylysy aıaqtaldy. Bıyl «Ulytaý», «Gaýhar ana», «Ordabasy» jáne «Saýran» mýzeı-qoryqtarynyń vızıt ortalyqtary qurylysyn aıaqtaýdy josparlap otyrmyz. Sonymen birge 2021 jyldan bastap «Esik», «Berel», «Shiliktini» iske qosýdy kózdeýdemiz», - dedi Aqtoty Raıymqulova OKQ alańy arqyly halyq aldynda esep berý kezdesýinde.

Sonymen birge Aqtoty Raıymqulova 2019 jyly «Álem mýzeıi boıynsha Altyn adamnyń sherýi» halyqaralyq kórme jalǵasyn taýyp, úsh jyl ishinde kórme 12 elde uıymdastyrylǵanyn atap ótti.

«QR Ulttyq mýzeıi men Almaty qalasyndaǵy QR Ortalyq memlekettik mýzeıi onlaın týrlar men vırtýaldy ekskýrsııalar boıynsha TMD elderiniń úzdik tarıh jáne mádenıet mýzeıleri reıtıngisinde TOP-5 qataryna engenin erekshe atap ótkim keledi. 2019 jyldan bastap «Mýzeıler sherýi» respýblıkalyq aktsııasy iske qosylyp, 125 otandyq mýzeıde kelýshilerdiń sany 150 myń adamdy qurady», - dedi mınıstr.