Eshkim aýyrmasa da, dári-dármekti molynan satyp alyp, úıde qoıma jasaýdyń qajeti joq – dáriger

ALMATY. QazAqparat – Almatyda ótken onlaın brıfıngte dáriger-ınfektsıonıst Tamara Ýtaǵanova halyqtyń aýyrmasa da, dári-dármekti aldyn ala alyp, jınaýyna qatysty pikir bildirdi, dep habarlaıdy QazAqparat tilshisi.

«Aldyn ala dári satyp alyp, qor jınap, úıde qoıma jasaýdyń qajeti joq. Keıin dáriger em-domdy sizdiń úıińizde bar dárige qarap taǵaıyndamaıdy. Sondaı-aq, olardyń jaramdylyq merzimi de bar», - deıdi T.Ýtaǵanova.

Dárigerdiń aıtýynsha, antıbıotık - vırýsty pnevmonııany emdeýde eń birinshi qajet dári emes. Ony tek bakterıaldy asqyný, ekinshi ınfektsııa qosylǵan jaǵdaıda taǵaıyndaıdy.

«Bizge kelgen naýqastardyń kópshiligi úıinen antıbıotıktiń bir emes, birneshe túrin alyp keledi. Antıbıotıkten de aǵzada allergııa bolýy múmkin. Keıin dısbakterıoz týyndaýy yqtımal. Sonymen ol kerisinshe aǵzanyń qorǵanys qabiletin tómendetedi»,- deıdi dáriger.

Onyń aıtýynsha, koronavırýs ınfektsııasynan kóbine eresek adamdar japa shegedi.

«Balalarda jeńil ótetini ras. Biraq, bul sanıtarlyq normalardy saqtamaý kerek degendi bildirmeıdi. Mindetti túrde saqtyq sharalary jasalýy kerek», - dedi ol.