Eshqashan halqyńnan bıik bolma - Aıtbaevtardyń Dımashqa tilegi
Áleýmettik jeli búgin Dımashqa arnalǵan quttyqtaýlarǵa toly. Álemge belgili óner juldyzdary da qazaq atyn tanytqan jas jigitke óz tilekterin jetkizip jatyr. Biraq qashan da otbasynyń orny bólek. Búgin Aıtbaevtar áýleti óz balasyn erekshe quttyqtap, tilegi men lebizin jetkizdi.
«Bala patsha, týǵan kúnińmen! Ónerińmen barsha əlemdi tamsandyryp, bıik belesterden kórine ber. Eshqashan aýyrma, ómir jasyń uzaq bolsyn. Halyqtyń mańdaıyna bitken jaryq juldyzy bolyp júre ber. Úlkenge qurmet kórsetip, kishige úlgi bola bil. Eshqashanda halqyńnan bıik bolma! Otbasyńnan alǵan, boıyńa daryǵan qazaqı tərbıeni joǵaltpa, məńgilikke jadyńda ustaǵaısyń», - dep jazǵan Dımashtyń ájesi Mıýa Nızamýtdınova. Dımash ájesine rızashylyǵyn bildirip, saǵynǵanyn jetkizgen.
Qanat pen Sveta Aıtbaevtar da Dımashqa júrekjardy tilekterin jazdy.
«Dımash, sen ómirge kelgen mamyrajaı mamyrdyń shýaqty kúni, ata-anamnyń «Uldy boldyq!» dep shattanyp, ulan-asyr toı jasaǵany, qýanysh ústinde «Balapanym!
Ata-anamnyń əldıisiń!
Alyp ushqan kóńilimniń ən-kúıisiń!
Shat kúlkimen ómirge qadam basa ǵoı!
Baqytyńnyń shektelmesin mólsheri,
júregimniń kip-kishkentaı bólshegi!» dep ən arnaǵanym kúni keshegideı kóz aldymda...
Bərimizdiń mahabbatymyzǵa bólenip óstiń. Əsirese, papamyz ben mamamyzdyń ózińe degen sezimi erekshe bolatyn! Əli kúnge solaı. Tóbeńnen qus ushyrmaıdy. Mamamyz basyńnan sıpap otyryp «meniń qulynym boıy uzyn, oıy bıik, armany asqaq, júregi jumsaq, meıirimdi azamat bolyp ósedi» dep aınalyp, tolǵanýshy edi. Sen aqyldy azamat bop erjettiń. Ómir - buralańdy soqpaqtardan, dańǵyl joldardan, jabysqaq batpaqtardan, móldir aıdyndardan turatyn kúrdeli əlem... Ər adam ómirge óz terezesinen qaraıdy. Bireýdiń terezesi kirshiksiz taza. Ol əlemniń bərin ədemi etip kóredi, al bir adamdar aınalaǵa jýylmaǵan kir terezesinen qaraıdy...
Ómirde qandaı adamdy keziktirseń de boıynan jaqsylyq izdeýge tyrys, qýanysh syılaýǵa tyrys! Terezelerdiń tazarýyna kómektes... Búgin týǵan kúniń! Otbasymyz úshin qýanyshty kún. Ómiriń məndi de səndi, ǵumyryń uzaq, baqytty bolsyn, Dıkonym! Aǵataıyń», - dep jazdy Qanat Aıtbaev.
Óz quttyqtaýyn Sveta Aıtbaeva da jetkizgen. Ol: «Dıkontaıym! Týǵan kúniń qutty bolsyn! Eń bastysy, aman júr, ǵumyrly bol! Bizdiń otbasymyzdy, aǵaıyndy, dos-jarandy ǵana qýantyp dúnıege kelip ediń, shúkir, búginde dúıim jurtty, búkil eldi qýantyp júrsiń. Osy betińnen taıma! Biz úshin, artyńnan ergen qos baýyryń úshin seniń ornyń erekshe. Biz seni jaqsy kóremiz! Armanshyl balapan, barlyq armandaryń oryndalsyn», - dep jazdy.
Dımashtyń qaryndasy Raýshan Qudaıbergen de óz lebizin bildirdi. «Búgin álemdegi eń kúshti aǵanyń, ata men áje, papa men mama úshin jaqsy balanyń, jankúıerleri úshin eń keremet ánshiniń týǵan kúni. Kóke, týǵan kúniń qutty bolsyn! Júzińnen eshqashan kúlki ketpeı, qýanyshty kúnderiń kóp kezdessin. Eshqashan aýyrmaı, barsha halyqty óz ónerińmen tamsandyra ber», - dep jazdy ol.