Esh jamandyq kórip turǵan joqpyn – Abaev oqýshylardyń eden jýýy jaıly

NUR-SULTAN. QazAqparat – Oqýshylardy eden jýýǵa eshkim kúshtemeıdi. Aqparat jáne qoǵamdyq damý mınıstri Dáýren Abaevtyń esepteýinshe, bul bul másele barlyq taraptyń kelisimimen bolýy kerek, dep habarlaıdy QazAqparat tilshisi.

«Balalardy eńbekke tartý bastamasynan eshqandaı jamandyq kórip turǵan joqpyn. Árıne, birqatar mańyzdy nıýans bar. Birinshiden, bastysy – bul oqýǵa kedergi keltirmeýi kerek. Bárimiz de balalarda oqý kóp ekenin, sabaqtan keıin úıirmelerge baratynyn bilemiz. Ekinshiden, bul bastama erikti bolýy tıis. Búgin osy eriktilik usynylyp ta otyr. ıAǵnı, mektep ata-analarmen, balalarmen aqyldasyp, ortaq sheshimge kelýi kerek. Eger bireý úshin eden jýý qaǵıdat retinde shegelenip qalsa, eger bireýge qolǵa shúberek ustap, eden jýý qorlyq retinde kórinse – ondaı oqýshyny eshkim de kúshtemeıdi», - dedi Dáýren Abaev «Habar» arnasyndaǵy «Ashyq dıalog» baǵdarlamasynda.

Mınıstrdiń aıtýynsha, osy bastamaǵa baılanysty tazalyq qyzmetkerlerin jumystan shyǵarý josparlanyp otyrǵan joq.

«Mektep jasynda kezekshilikke turyp, tazalyq jumystaryn júrgizgenimiz esimde. Biz masaq terýge shyǵatynbyz. Oǵan qosa, oqýshylar – bárimiz sportpen de aınalysyp, úıirmelerge, bı keshterine baryp ta úlgeretinbiz. Búgingi oqýshylardyń ata-analarynyń kópshiligi bul joldy basyp ótken. Qysqasha aıtqanda, oqýshylardy qajetsiz sharalarǵa shapqylatýmen kúresýimiz kerek. Biraq, balalardy eńbekke tartý, óz jumys ornyńda tazalyqqa baýlý – budan men esh jamandyq kórip turǵan joqpyn», - dedi Dáýren Abaev.

Eske sala ketsek, buǵan deıin QR Bilim jáne ǵylym mınıstri Ashat Aımaǵambetov oqýshylardyń synypta eden jýýy bastamasyna pikir bildirgen bolatyn.