Esep komıteti: Ulttyq kınoındýstrııany qoldaýda olqylyqtar barshylyq

NUR-SULTAN. QazAqparat – Esep komıtetiniń otyrysynda Mádenıet jáne sport mınıstrliginiń jekelegen bıýdjettik baǵdarlamalarynyń iske asyrylýy boıynsha júrgizilgen memlekettik aýdıttiń qorytyndysy jarııalandy, dep habarlaıdy QazAqparat tilshisi.

«Mádenıet jáne sport mınıstrliginiń qabyldaǵan sharalaryna qaramastan, qazirgi ýaqytta mádenıet salasyndaǵy memlekettik saıasatty iske asyrý máselelerinde birqatar júıelik problema bar. Mınıstrlik bólingen qarajatty tıimdi paıdalaný jumysyn jetkilikti dárejede baqylamaı otyr. Áleýmettik mańyzy bar jáne mádenı sharalardy ótkizý aıasynda jeke memlekettik satyp alýlardy jarııalaǵan kezde áleýetti jetkizýshilerge quqyqqa qaıshy talaptar qoıylady. Osylaısha, memlekettik satyp alýǵa qatysýǵa nıetti jetkizýshilerdiń sany azaıady», - dedi Esep komıtetiniń múshesi Talǵat Jaqan elordada ótken baspasóz máslıhatynda.

Onyń aıtýynsha, ulttyq kınoındýstrııany qoldaý sharalarynyń olqylyqtary barshylyq.

«Jańadan qurylǵan «Ulttyq kınony qoldaýdyń memlekettik ortalyǵy» aktsıonerlik qoǵamynyń biryńǵaı operatoryn qarajatpen qamtý memlekettik bıýdjettiń esebinen júzege asyrylady. Sonymen birge, bul ortalyqtyń basqa kiris kózi joq», - dedi Talǵat Jaqan.

Onyń aıtýynsha, osy jyldyń naýryz aıynda qurylǵan ortalyqtyń shyǵyny 2019 jyldyń 1 qazanyndaǵy jaǵdaı boıynsha 126,6 mln teńgege jetken. Al oǵan negizinen 2 mlrd 460 mln teńge bólingenimen atalǵan somanyń 5,1 paıyzy ǵana ıgerilip otyr. Qalǵan aqshanyń ıgerilmeı qalatyn túri bar.

«Onyń ústine Kıno ortalyǵy ashylǵaly sarapshylar keńesiniń bir ǵana otyrysy ótken», - deıdi ol.