Esep komıteti Mańǵystaýda 22,9 mlrd teńgeniń jumsalýyndaǵy kemshilikti anyqtady

ASTANA. QazAqparat - Esep komıtetiniń otyrysynda Mańǵystaý oblysyna bólingen respýblıkalyq bıýdjet qarajatynyń jumsalýyna júrgizilgen memlekettik aýdıtke qorytyndy jasaldy, dep habarlaıdy QazAqparat vedomstvonyń baspasóz qyzmetine silteme jasap.

Otyrysta birqatar júıelik buzýshylyqtar men jetispeýshilikter jáne maqsatty kórsetkishter men júzege asyrylyp jatqan baǵdarlamalardyń nátıjesine keri yqpal etken qarjylyq jáne bıýdjettik tártipterdiń, bıýdjettik jáne ózge de zańnamalardyń saqtalmaǵany atalyp ótti.

«Qazaqstan Respýblıkasyndaǵy sáýlet, qala qurylysy jáne qurylys qyzmeti týraly» zańynyń buzylyp 23 joba boıynsha ýaqytsha ǵımarattar men qurylymdardan túsken 32,8 mln teńge kólemindegi soma bıýdjetke aýdarylmaǵan, avtorlyq jáne tehnıkalyq baqylaýsyz 1 365,4 mln teńgege, ókiletti organdarǵa habar berilmeı - 687,4 mln teńgege qurylys jumystary júrgizilgen.

Salynyp bitpegen qurylys nysandaryn, qabyldaý komıssııasy maquldamaǵan nysandardy qabyldap alý faktilerine jol berilgen», - dep habarlady Esep komıtetiniń baspasóz komıteti.

Máselen, quny 2 799,8 mln teńge bolatyn «Jańaózen qalasyndaǵy ortalyq qazandyqty kishi jylý elektr ortalyǵyna aýystyrý, qaıta óńdeý jáne keńeıtý, 4 kezeń» nysany tolyq daıyn bolmasa da, paıdalanýǵa qabyldanǵan.

Qabyldaý komıssııasynyń aktisinsiz 13,4 mln teńge bolatyn Aqtaý qalasynyń 32a shaǵynaýdanyndaǵy árizdik sorǵy stantsııasy jáne smetalyq quny 1 451,4 mln teńge S.Shapaǵatov aýylynyń sý qubyry men sý qoımasy paıdalanýǵa berilgen.

Aqtaý qalasynda jalpy somasy 3 912,7 mln teńgege turǵyzylǵan tórt turǵyn úı-kommýnaldyq sharýashylyq nysan 2015-2016 jyldary paıdalanýǵa berilse de, paıdalanýshy uıymnyń enshisine qabyldanbaǵan.

Smetalyq quny 501 mln teńgeni quraıtyn Beıneý aýylynda 2016 jyly qoldanýǵa berilgen aýylishilik sý qubyrynyń úshinshi ýchaskesi jumys istemeı tur.