Esep komıteti: Atyraý oblysy ákimdiginiń keı basqarmalarynda júıeli kemshilikter bar

ASTANA. QazAqparat - Respýblıkalyq bıýdjettiń atqarylýyn baqylaý jónindegi Esep komıtetiniń kezekti otyrysynda Atyraý oblysyna bólingen respýblıkalyq bıýdjet qarajatynyń paıdalanylýyna júrgizilgen memlekettik aýdıttiń qorytyndylary jarııalandy, dep habarlaıdy QazAqparat tilshisi.

Otyrysta Esep komıtetiniń múshesi Talǵat Jaqan baıandama jasady.

«Memlekettik aýdıt jumystary Atyraý oblysynda jalpy somasy 33 mlrd 110 mıllıon teńgelik 10 nysandy qamtydy. Esep komıtetiniń aýdıtorlyq sharalarynyń nátıjesi jeke oblystyq basqarmalar men Abyraý oblysy ákimdikteriniń bólimderinde júıeli kemshilikter baryn, ákimshilik tarapynan jergilikti bıýdjetti baǵdarmalarǵa laıyqty monıtorıng jumystary men baqylaý jetispeıtinin kórsetip otyr», - deıdi Talǵat Jaqan.

Esep komıteti múshesiniń aıtýynsha, jalpy somasy 498 mln teńge bolatyn qarjylyq buzýshylyqtar anyqtalǵan. Sondaı-aq, protsedýralyq sıpatta 108 buzýshylyq belgili boldy.

«Іshki óńirlik qurylymdyq ónimniń taldaýy jalpy mólsherde aýyl sharýashylyǵy, ónerkásip salasynda ónimdiliktiń tómendegenin kórsetti. Munaı-gaz kompanııasynyń jumysynyń ósimi tirkelse, ol jaqta shaǵyn jáne orta bıznes sýbektileriniń azaıyp kele jatqany baıqalady. Memlekettik aýdıt anyqtaǵandaı, jergilikti bıýdjettik baǵdarlamalardyń ákimshileri aımaqty damytý baǵdarlamalary men aımaqtyń áleýmettik-damý josparly kórsetkishterine sapaly josparlaý júrgizbegen. Máselen, Atyraý qalasynyń «Kóktem» turǵyn-úı massıvinde ınjenerlik jeliler úshin 2018 jyly Ulttyq qordan bólingen qarajattyń 16 mıllıon teńgesi ıgerilmeı, bıýdjetke qaıtarylǵan», - deıdi ol.

Sondaı-aq, Talǵat Jaqan atap ótkendeı, oblys ortalyǵynyń ınjenerlik-kommýnıkatsııalyq ınfraqurylymyn josparlaý kezindegi jergilikti atqarýshy organdardyń ózara kelisip almaýy saldarynan 900 mln teńge memleket qarjysyn durys josparlanbaǵan. Atyraý qalasyndaǵy «Bereke» shaǵyn aýdanyndaǵy turǵyn úı qurylysynyń jobalyq-smetalyq qujattarynyń sapasyz daıyndalýynan 155 páterlik úsh turǵyn úı ýaqtyly paıdalanýǵa berilmegen.

«Nursaıa» shaǵyn aýdanynda úsh aýysymdy mekteptiń jaıy men mektep jetispeýshiligi máselesi áli de sheshilmegen. 2017 jyly paıdalanýǵa berilgen 620 oryndyq mektepte 1 850 bala oqyp jatyr. Ol mektepte oqýshylar sany standarttan 3 ese artyq. Densaýlyq saqtaý salasyna da bólingen qarajat tolyǵymen tıimdi atqaryldy degenge kelmeıdi. Aımaqta medıtsınalyq kadrlardyń jetispeýshiligi seziledi. Kepildendirilgen tegin medıtsınalyq kómek aıasynda alynǵan medaparattar tıimdi qoldanylyp jatqan joq», - deıdi Talǵat Jaqan.

Esep komıtetiniń múshesi sózin aıaqtaı kele memlekettik aýdıttiń tekserisinen keıin birshama kemshilikter joıylǵanyn da aıtty.