Esep beretin memleket qalyptastyrý jónindegi jumys tobynyń otyrysy ótti

ASTANA. QazAqparat - Jańǵyrtý jónindegi ulttyq komıssııanyń múshesi, esep beretin memleket qalyptastyrý jónindegi jumys tobynyń jetekshisi, Qazaqstan Respýblıkasy Parlamenti Senaty Tóraǵasynyń orynbasary Bektas Beknazarov Ult josparynyń besinshi «Esep beretin memleket qalyptastyrý» baǵytynyń oryndalý barysyn qarastyrý jónindegi jumys tobynyń otyrysyn ótkizdi.

Otyrysta Memleket basshysy N.Á.Nazarbaevtyń bıylǵy 24 qarashada ótken Jańǵyrtý jónindegi ulttyq komıssııasynyń qyzmeti máseleleri jónindegi keńesindegi tapsyrmalaryn iske asyrýdaǵy tıisti memlekettik organdar ókilderiniń esepteri tyńdaldy.

B. Beknazarov óz sózinde atqarylǵan jumystardy qorytyndylady. Atap aıtqanda, ol memlekettik josparlaýdyń shaǵyn júıesin qalyptastyrý aıasynda 16 salalyq baǵdarlamanyń 11-iniń kúshi joıylǵanyn, áleýmettik-ekonomıkalyq erekesheligine baılanysty 5-eýiniń úkimettik baǵdarlamaǵa ózgertilgenin atap ótti. Baǵdarlamalyq qujattardyń negizsiz kóbeıýine jol bermeý maqsatynda olardy ázirleýge talap kúsheıtildi.

Senat Tóraǵasynyń orynbasary Esep komıteti men qarjy baqylaý organdarynyń saraptamalyq-taldaý quramy kúsheıtile otyryp, álemdik aýdıtorlyq kompanııalar úlgisi boıynsha reformalaý júrgizilip jatqanyn habarlady.

B. Beknazarovtyń aıtýynsha, zańmen tyıym salynbaǵan aqparattardy alýy men taratý erkindigi týraly azamattardyń konstıtýtsııalyq quqyqtary júzege asyrylatyn «Aqparatqa qol jetkizý týraly» zańnyń qabyldanýy mańyzdy qadam boldy.

Baıandamada «Ashyq úkimettiń» engizilýi tıisti baǵasyn aldy. Memlekettik organdardyń málimetteri men bıýdjet qarjysyn ıgerý týraly aqparatqa qol jetkizýge bolatyn «Ashyq úkimettiń»: «Ashyq málimetter», «Ashyq normatıvti quqyqtyq aktiler», «Ashyq bıýdjetter» jáne «Ashyq dıalog» tórt bóligi iske qosyldy. Sondaı-aq normatıvtik quqyqtyq aktilerdiń jobalary men tujyrymdamalar jobalaryn qaraýǵa azamattardyń qatysýy qamtamasyz etildi.

Odan basqa, Tóraǵa orynbasary «Azamattarǵa arnalǵan úkimet» memlekettik korporatsııasynyń «bir tereze» qaǵıdasy boıynsha 530 memlekettik qyzmet kórsetilýiniń arqasynda qazirgi kezde memlekettik qyzmetterdiń sapasyn jaqsartý men merzimin qysqartýǵa, sondaı-aq barlyq úderisterdiń aıqyndyǵyn arttyrýǵa qol jetkenin atap ótti. 

B. Beknazarov bıyl ótken mınıstrler men ákimderdiń esep berýge arnalǵan kezdesýleri halyq aldynda jaýapkershilik pen esep berýdi arttyrýǵa múmkindik bergenin de aıtty.

Senat Tóraǵasynyń orynbasary aldaǵy jumystardyń negizgi baǵyttaryna toqtaldy. Olardyń qatarynda komıssııanyń memlekettik organdardyń mindetin básekelester ortasy men ózin-ózi retteıtin uıymdarǵa berý jónindegi usynystar ázirleýge arnalǵan qyzmeti, sondaı-aq aýdandyq mańyzy bar qala, aýyl, kent jáne aýyldyq okrýg deńgeıindegi derbes bıýdjet pen kommýnaldyq menshikti engizýdi kózeıtin jergilikti ózin-ózi basqarýdy damytý jónindegi zań jobasyn qabyldaý kózdelip otyr.

Sonymen birge B.Beknazarov alǵa qoıylǵan mindetterge qol jetkizý úshin talap etiletin birqatar máselelerdi atap ótti. Barlyq salalar boıynsha atqarylatyn jumystar belgilengen merzimde aıaqtalýy tıis.