Esentúgel Eleýken: Elbasynyń ókilettigin toqtatýy - tarıhı sheshim

ASTANA. QazAqparat - Elbasynyń Prezıdenttik ókilettigin toqtatýy tarıhı sheshim boldy. Mundaı pikirdi «Tamasha» telearnasy dırektory Esentúgel Eleýken bildirdi, dep habarlaıdy QazAqparat tilshisi.

«Elbasynyń táýelsiz Qazaqstanǵa sińirgen eńbegi ushan-teńiz ekendigin jaqsy bilemiz. Biraq bul joly prezıdenttik ókilettigin doǵarý úshin jaıdan-jaı sheshim qabyldaı salǵan joq. Qazaqstan halqyna arnaǵan málimdemesinde de árbir qazaqstandyqtyń júregin eljireter ulaǵatty sózder aıtty. Jalpy, eń basty baılyǵymyz - Táýelsizdigimiz. Qalǵany bos sóz. Osy Táýelsizdigimizdi odan ári nyǵaıtyp, ósip-órkendegen elderdiń qataryna qosylý jolynda tynbaı eńbek etýimiz kerek», - dedi Esentúgel Eleýken.

«Tamasha» telearnasynyń dırektory Elbasy Nursultan Nazarbaevty tulǵa retinde joǵary baǵalap, qurmetteıtindigin atap ótti.

«Kezinde ózim de úlken ujym basqardym, ońaı emes ekendigin jaqsy bilemin. Bireýdiń kóńilinen shyǵýyń kerek, endi birine ursyp ta jatasyń. Al búkil eldi basqaryp otyrǵan azamattyń bılikten óz erkimen bas tartýy tarıhı sheshim ekendiginde daý joq. Endi daýryqpaı, artyq-aýys áńgimege jol bermeı, urany bir, órkenıetke bastar joly ortaq el retinde Elbasynyń barlyq bastamalaryn odan ári jalǵastyrýymyz qajet», - dedi ol.