Erjan Maksım «Aıbyn» áskerı-patrıottyq jıynyna keldi

SPASSK. QazAqparat - Qaraǵandy oblysyndaǵy «Spassk» oqý ortalyǵynyń polıgonynda besinshi respýblıkalyq áskerı-patrıottyq «Aıbyn» jastar jıyny jalǵasýda, dep habarlaıdy QazAqparat tilshisi QR Qorǵanys mınıstrliginiń baspasóz qyzmetine silteme jasap.

Búginge deıin saıystyń tórt kezeńi ótip qoıǵan. Atap aıtqanda, AK-74 avtomatyn shashý jáne jınaý, jalpyáskerı qorǵanys komplektin kııý normatıvin oryndap, eldi mekenniń ýlanǵan ýchaskesinen júrip ótý, kedergiler jolaǵyn basyp ótý, sondaı-aq radıostantsııamen jumys boıynsha saıystar aıaqtaldy.

Jıyn barysynda dástúrli túrde jastar týrnıkten kúshtik jattyǵýlardy oryndap, qýaty men jigeriniń myqty ekenin dáleldeıdi. Al qyzdar keshendi kúshtik jattyǵýlardy oryndaıdy.

Sonymen qatar, jıynǵa qatysýshylar Qorǵanys mınıstrliginiń basshylarymen, Qaraǵandy oblysy ákimdiginiń ókilderimen, sonymen birge «Golos. Detı» baıqaýynyń qatysýshysy Erjan Maksımmen, shahmattan álemniń bes dúrkin chempıony Bıbisara Asaýbaevamen keńesti.

Erteń áskerı-dalalyq taktıkalyq oıyndary ótedi. Keshke besinshi respýblıkalyq áskerı-patrıottyq «Aıbyn» jastar jıynynyń alǵashqy qorytyndysy jarııalanady.

Eske sala ketsek, keshe QR Prezıdenti - Qarýly kúshterdiń Joǵarǵy Bas qolbasshysy Qasym-Jomart Toqaev Qaraǵandy oblysynda ótip jatqan «Aıbyn» respýblıkalyq áskerı-patrıottyq jastar jıynyna qatysyp, sóz sóılegen bolatyn.