Erjan Birjanov ulttyq biliktilik júıesindegi problemalardy atady
«Ulttyq biliktilik júıesi - bilim berý júıesi men eńbek naryǵy arasyndaǵy ózara baılanysty qamtamasyz etetin tetik. Búginde mynadaı problemalar bar: biliktilikti taný amaldarynyń ártúrli ári júıesiz tásili; sertıfıkattaýdy ótkizý sapasy boıynsha baqylaýdyń bolmaýy; sondaı-aq biliktilikti taný júıesin damytý úshin yntalandyrý sharalarynyń jetkiliksizdigi. Sondyqtan biz mynadaı mindetterdi sheshýge tıispiz: biliktilikti tanýdyń qoldanylatyn barlyq tásilin zańnamalyq turǵyda bekitý; bilim berý salasyndaǵy atlas engizý; biliktilikti taný júıesine kirý úshin yntalandyrý is-sharalaryn aıqyndaý. Osy is-sharalardy júzege asyrý ulttyq biliktilik júıesiniń barlyq elementterin júıeleýge múmkindik beredi. Bul óz kezeginde quqyqtyq bazany qurýǵa, sondaı-aq biliktilikti taný júıesin retteýdi birizdendirýge yqpal etedi», - dedi vıtse-mınıstr Májiliste jumyskerlerdi qaıta oqytý jáne olardyń daǵdylaryn turaqty jetildirý jónindegi jańa tásilderge arnalǵan dóńgelek ústel otyrysy barysynda.
Sonymen qatar ol atalǵan baǵytta júrgizilgen jumystarǵa toqtalyp ótti.
«Biz salalyq memlekettik organdarmen jáne jumys berýshilermen birlesip, Ulttyq biliktik júıesin damytý aıasynda 589 kásibı standartty ázirledik jáne buıryq arqyly bekittik. Osy kásiptik standarttardyń negizinde 250 bilim berý baǵdarlamasy jańartyldy. Tehnıkalyq jáne kásiptik bilim deńgeıleri 102 úlgilik oqý baǵdarlamasyn ózektendirdi. Sonymen qatar Dúnıejúzilik bankpen birlesip, ekonomıkanyń 9 salasynan turatyn «Eńbek naryǵynda suranysqa ıe jańa mamandyqtar men biliktilikter atlasyn» jasadyq. Bıyl da ulttyq biliktilik júıesin jetildirý jumysy jalǵasatyn bolady»,- dedi Erjan Birjanov.