Erulan Jamaýbaev memlekettik bıýdjet kiristeri boıynsha esep berdi
«Ótken jyly memlekettik bıýdjetke 9 trln 751 mlrd teńge kiris tústi nemese jospar 102,7 paıyzǵa atqaryldy. 2019 jylmen salystyrǵanda 62,7 mlrd teńgege ósti, ıaǵnı jospar 100,6 paıyzdy qurady. Jergilikti bıýdjetterdiń kiristeri boıynsha jospar 108 paıyzǵa atqaryldy nemese josparlanǵan 2 trln 955 mlrd teńgeniń ornyna 3 trln 191 mlrd teńge tústi», - dedi E. Jamaýbaev.
Onyń aıtýynsha, byltyr respýblıkalyq bıýdjetke 6 trln 561 mlrd teńge kiris tústi nemese jospar 100,3 paıyzǵa atqaryldy. Kirister boıynsha jospar 22 mlrd teńgege, onyń ishinde salyqtar – 16 mlrd teńgege asyra oryndaldy.
«Salyqtar boıynsha asyra oryndaýdyń negizgi somasy korporatıvtik tabys salyǵyna, paıdaly qazbalardy óndirý salyǵyna jáne shıki munaıǵa salynatyn eksporttyq keden bajyna tıesili boldy», - dedi mınıstr.
Sonymen qatar ol byltyrǵy bıýdjet shyǵystaryna qatysty toqtaldy.
«Memlekettik bıýdjettiń shyǵystary 98,2 paıyzǵa, respýblıkalyq bıýdjettiń shyǵystary 98,3 paıyzǵa, jergilikti bıýdjetterdiń shyǵystary 99,1 paıyzǵa atqaryldy. Respýblıkalyq bıýdjet boıynsha 14 trln 234 mlrd teńge somaǵa shyǵystar júrgizildi. Atqarylmaý 241 mlrd teńgeni qurady. Onyń ishinde 224 mlrd teńge Úkimet rezervi boıynsha únemdelgen aqsha jáne ózge de únemdeý. Igerilmegeni - 15,8 mlrd teńge. Onyń negizgi sebepteri: ónim berýshilerdiń shart talaptaryn buzýy, tólem jónindegi qujattardy uzaq kelisý, oryndalǵan jumystar aktilerin usynbaý jáne basqa da jaǵdaılarǵa baılanysty», - dedi mınıstr.