Erulan Jamaýbaev kvazımemlekettik sektordyń tıimsiz sýbektilerine qatysty pikir bildirdi

NUR-SULTAN. QazAqparat – Kvazımemlekettik sektor sýbektileriniń qyzmetin barynsha ońtaılandyrý kózdelip otyr. Bul týraly Májilistiń jalpy otyrysynda QR Úkimetiniń 2020 jylǵy respýblıkalyq bıýdjettiń atqarylýy týraly esebin talqylaý kezinde QR Qarjy mınıstri Erulan Jamaýbaev málim etti, dep habarlaıdy QazAqparat tilshisi.

«Esepti talqylaý kezinde kvazımemlekettik sektor sýbektileriniń qyzmeti boıynsha eskertýler men usynymdar aıtyldy. Bul - kompanııalardyń shyǵyndylyǵy, olardyń shottaryndaǵy bıýdjet qarajatynyń aıtarlyqtaı qaldyqtary jáne basqalar.

Memlekettik basqarýdy damytý tujyrymdamasynda kvazımemlekettik sektor sýbektileriniń qyzmetin barynsha ońtaılandyrý kózdelgen. Shyǵyndy kompanııalar boıynsha saýyqtyrýdyń arnaıy jospary qabyldanatyn bolady. Eger osy shara uıymnyń nátıjelerin jaqsartpasa, onda ol jekeshelendirýdiń, qaıta qurylymdaýdyń nemese taratýdyń tıisti josparyna engiziledi», - dedi E. Jamaýbaev.

Onyń aıtýynsha, memlekettik múlikti basqarý tıimdiligin baǵalaý olardyń básekege qabilettiligi, rentabeldiligi, kiristiligi jáne qarjylyq turaqtylyǵy turǵysynan júzege asyrylatyn bolady.

«Esepti talqylaý kezinde Ulttyq qordyń jınaqtaý fýnktsııalaryn kúsheıtý máselesi de kóterildi. Osyǵan baılanysty ótken jyly Ulttyq qordyń aktıvteri 742 mlrd teńgege óskenin atap ótý kerek. Qordy basqarýdan túsken ınvestıtsııalyq kiris 4,1 trln teńgeni qurady. Bul 2019 jylmen salystyrǵanda 2,5 ese kóp. Bıýdjet kodeksine engizilgen túzetýlerge sáıkes 2024 jyldan bastap kepildendirilgen transfert boıynsha jańa kontrtsıkldyq qaǵıdany qoldaný josparlanyp otyr. Kepildik berilgen transfert munaıdyń konservatıvtik baǵasy (kesimdi baǵa) kezinde munaı sektorynan Ulttyq qorǵa túsetin túsimder mólsherinen aspaıtyn mólsherde aıqyndalatyn bolady. Bul munaıǵa táýelsiz tapshylyqty tómendetýge jáne Ulttyq qordyń ósýine yqpal etedi», - dedi mınıstr.