Erulan Jamaýbaev 3 jyldyq bıýdjettiń áleýmettik shyǵystaryn atady

NUR-SULTAN. QazAqparat – 3 jyldyq bıýdjette áleýmettik shyǵystar kólemi 26,8 mln teńge bolady. Bul týraly Senattyń jalpy otyrysynda QR Qarjy mınıstri Erulan Jamaýbaev aıtty, dep habarlaıdy QazAqparat tilshisi.

«Halyqtyń ál-aýqatyn arttyrý – basty basymdyqtyń biri. Ony bıýdjettiń áleýmettik shyǵystarynyń ósý dınamıkasy kórsetip otyr. Máselen, osy baǵyt boıynsha úshjyldyq kezeńdegi shyǵystar 26,8 trln teńgeni, onyń ishinde 2022 jyly - 8,1 trln teńgeni nemese shyǵystardyń jalpy kóleminiń 50,8 paıyzyn quraıtyn bolady. Áleýmettik kómekke jáne qamsyzdandyrýǵa 13,4 trln teńge, onyń ishinde kelesi jylǵa 4,3 trln teńge josparlanǵan. Onyń 94 paıyz zeınetaqy, járdemaqy, ataýly áleýmettik kómek, jekelegen sanattaǵy azamattarǵa birjolǵy qarjylaı ótemaqy tóleýge arnalǵan», - dedi «2022-2024 jyldarǵa arnalǵan respýblıkalyq bıýdjet týraly» zań jobasy týraly baıandaǵan Erulan Jamaýbaev.

Mınıstr dereginshe, densaýlyq saqtaýǵa arnalǵan shyǵystar 2022-2024 jyldary 5,7 trln teńgeni, onyń ishinde kelesi jyly 1,8 trln teńge bolmaq. Osy qarajat aıasynda medıtsına qyzmetkerleriniń jalaqysyn ulǵaıtýǵa shyǵystar kózdelgen.

«Bilim jáne ǵylymdy damytýǵa bıýdjet jobasynda 7,0 trln teńge, onyń ishinde 2022 jylǵa 1,8 trln teńge kózdelgen», - dedi ol.

Onyń atap ótýinshe, bıýdjet shyǵystarynyń kelesi mańyzdy baǵyty - ekonomıka salalaryn qoldaý jáne damytý.

«Úsh jyldyq kezeńde osy maqsattarǵa 3,6 trln teńge, onyń ishinde 2022 jylǵa 2 trln teńge qarastyrylǵan. Osy baǵyt esebinen kólik ınfraqurylymyn damytý, halyqtyń áleýmettik turǵyn úıler salý, taza aýyz sý jáne tabıǵı gazben qamtamasyz etý, bıznesti qoldaý jáne basqa da basym mindetterdi iske asyrý josparlanyp otyr. Memlekettiń qorǵanys qabileti men quqyq tártibin qamtamasyz etýge úsh jylǵa 4,5 trln teńge, al 2022 jylǵa 1,7 trln teńge kózdelgen»,- dedi Erulan Jamaýbaev.