Ertistiń tasýyna baılanysty Kenjekól kentinde jaǵalaý nyǵaıtylyp jatyr
Pavlodar oblysy tótenshe jaǵdaılar departamentiniń kúsh-quraldary men jergilikti atqarýshy organdardyń qyzmetkerleri jáne Kenjekól kentiniń turǵyndary tize qosyp, sý tasqynyna qarsy aldyn alý sharalaryn júrgizip jatyr.
«Eldi mekendi sý tasqynynan qorǵaý úshin úıindini nyǵaıtý, qapshyqtardy daıyndaý jáne tóseý jumystary júrgizilýde. Barlyǵy 91 tonna ınertti materıal ákelindi, 400 qap tóseldi jáne 250 qap ınertti materıal daıyndaldy» dep habarlady óńirlik tótenshe jaǵdaılar departamentiniń baspasóz qyzmetinen.
Barlyǵy 100-den astam adam jumysqa tartyldy.
Kenjekól kentiniń ákimi Medet Sansyzbaevtyń aıtýynsha, eldi mekenge qaýip tónip turǵan joq. Deıturǵanmen bıyl Ertis ózenine sý jyldaǵydan mol jiberilýine baılanysty aýyl shetindegi jaıylmalar lyq tolǵan.
Aýyl aınalasyna úıilgen topyraq úıindileri kún saıyn nyǵaıtylyp jatyr.
«Mundaı mol sýdyń sońǵy 5-6 jylda bolmaǵany tirkelip otyr. Jaıylmadaǵy sýdyń deńgeıi ádette 2 metrden aspaıtyn. Bıyl 2,5 metrge deıin kóterilgen. Osy apta sońyna qaraı deńgeıi túse bastaýy kerek. Jaǵdaı eki-úsh kúnde turaqtalady dep oılaımyz» deıdi M.Sansyzbaev.