Ertispen júk tasymaldaý úshin Reseı jáne Qytaı taraptarymen kelissóz júrgizilip jatyr

<p>Ertis ózenimen mýltımodaldy tranzıttik tasymal uıymdastyrý úshin Reseı jáne Qytaı taraptarymen kelissóz júrgizilip jatyr. Bul jaıynda Májilis depýtattarynyń saýalyna Premer-Mınıstrdiń birinshi orynbasary Roman Sklıardyń jaýabynda aıtylǵan, dep habarlaıdy <a href="https://kaz.inform.kz/" target="_blank" rel="noopener">Kazinform.&nbsp;</a></p>

«Qazaqstan Respýblıkasynyń aýmaǵynda Ertis transshekaralyq ózeniniń paıdalanylatyn keme qatynasy ýchaskeleriniń uzyndyǵy 1 600,5 shaqyrym. 2023 jylǵy 1 qyrkúıektegi jaǵdaı boıynsha Ertis basseıninde tasymaldaý kólemi 1,1 mln tonna boldy. Keme júrisiniń gabarıtterin qamtamasyz etý maqsatynda Ertis ózeninde shamamen 2,3 mln tekshe metr kóleminde túbin tereńdetý jumystary júrgizilýde. Bul 2022 jylǵy kólemnen 64 paıyzǵa artyq», - dedi Úkimet basshysynyń birinshi orynbasary.

Onyń atap ótýinshe, Qazaqstannyń kólik-logıstıkalyq áleýetin damytýdyń 2030 jylǵa deıingi bekitilgen tujyrymdamasyna sáıkes «Qytaı-Qazaqstan-Reseı» baǵytynda Ertis ózenimen mýltımodaldy tranzıttik tasymaldardy uıymdastyrý kózdeledi.

«Osyǵan baılanysty Reseı jáne Qytaı taraptarymen osy tasymaldardy uıymdastyrý boıynsha kelissózder júrgizilip jatyr. Sondaı-aq Reseı men Qytaıǵa synaq reısin júzege asyrý boıynsha jumystar júrgizilip jatyr. Joǵaryda atalǵan is-sharalardy iske asyrý ózen kóligimen júk tasymaldaý kólemin 2030 jylǵa qaraı jylyna 2,5 mln tonnaǵa deıin ulǵaıtýǵa múmkindik beredi», - dedi Roman Sklıar.