Ertis jaǵasyndaǵy eldi mekender úshin qaýipti kezeń 20 sáýirde bastalýy múmkin — ınspektsııa

<p>PAVLODAR. KAZINFORM — Shyǵys Qazaqstandaǵy Buqtyrma men Shúlbi sý qoımalarynan Ertiske jalpy kólemi 6,5 tekshe kılometr sý jiberiledi. Bul — ótken jylmen salystyrǵanda 1,5 ese kóp.</p>

Sý resýrstary komıtetiniń sý resýrstaryn paıdalaný jáne qorǵaý jónindegi «Ertis» basseındik ınspektsııasy basshysynyń orynbasary Eleýsiz Qambarov Kazinform agenttiginiń tilshisine bergen suhbatynda Shyǵys Qazaqstandaǵy qoımalar qazir sý jiberýdiń negizgi ıadrosyna kiriskenin habarlady.

ıAǵnı 13 sáýirden beri ózenge sekýndyna 3500 tekshe metr sý quıylyp jatyr. Bul qubylys 24 sáýirge deıin jalǵasady.

Onyń sózinshe, sýdyń alǵashqy legi Pavlodar oblysyna 20 sáýirde kelip jetedi dep kútilip otyr.

Ózenniń oıpań tustarynda ornalasqan eldi mekender úshin sol ýaqytta qaýipti jaǵdaı týyndaýy múmkin.

— Qazgıdromet mekemesiniń gıdrobeketteri berip otyrǵan málimetke súıensek, Ertistiń sýy ázirshe kóp kóterile qoıǵan joq. Mysal úshin Pavlodar qalasyndaǵy Zaton beketinde sý deńgeıi 592 santımetrdi (qaýipti deńgeı — 800 sm) jáne Avtomobıl kópiri mańynda ol 479 santımetrdi (1084) kórsetip otyr. Ózenniń tómengi aǵysyndaǵy gıdrobeketterdiń keıbiri sý deńgeıi tipti tómendep ketkenin tirkedi. ıAǵnı Ertiste sý deńgeıi ázirshe qalypty. 20 sáýirden bastap Ertis ózeni arqyly úlken tolqyndar keledi. Sol ýaqytta sý deńgeıi kúrt kóteriledi dep kútilip otyr. Jiberiletin sý eń áýeli jaıylmalardyń sýǵa qanyǵýy úshin jasalyp otyrǵan shara ekenin eskerý kerek. Sý mol ekpinmen kelse, jaıylmalarǵa mol sý shyǵady. Shamamen 300 myń gektardan astam aýmaqty sý basýy kerek. Ekinshi másele, ózenniń oıpań tustarynda ornalasqan eldi mekenderge tasqyn sýdyń kirý yqtımaldylyǵy. Bizdiń shamalaýymyzsha, Maı aýdanynyń Qaratarek, Kóktóbe, Aqsaraı aýyldaryna, Pavlodar qalasynyń Kenjekól, Atameken kentteriniń tómengi aýmaqtarynda, Pavlodar aýdanynyń Mıchýrın aýylynda sýdyń jaıylýy bolýy múmkin. Jergilikti bılik jaqsy qamdansa, turǵyn úılerge tónip turǵan sonshalyqty qaýip joq, -deıdi E.Qambarov.

Eske sala keteıik, ótken aptadan Ertis ózenine Shyǵys Qazaqstandaǵy qoımalardan sý jiberile bastady.

Pavlodar oblysy sý tasqynynyń ekinshi kezeńine daıyndalyp jatyr. 

Eske sala keteıik, Pavlodarda úılerin sý basqan otbasylarǵa jańa baspana turǵyzylýda.